Erlent | mbl | 14.4.2018 | 15:54 | Uppfært 16:09

Öryggisráðinu mistókst að taka á árásunum

Neyðarfundur öryggisráðs Sameinuðu þjóðanna stendur nú yfir. AFP

Antonio Guterres, framkvæmdastjóri Sameinuðu þjóðanna, hvatti aðildarríki öryggisráðs SÞ til að sýna stillingu og koma í veg fyrir ástandið í Miðausturlöndum stigmagnaðist. Sagðist hann jafnframt harma það að öryggisráðinu hefði mistekist að komast að niðurstöðu um hvernig bregðast ætti við beitingu efnavopna í Sýrlandi. BBC greinir frá.

„Það er engin hernaðarlausn til ástandinu, lausnin verður að vera pólitísk,“ sagði hann og lagði áherslu á það að aðildarríkin fylgdu stefnu Sameinuðu þjóðanna og í samræmi við alþjóðalög.

Rússar fordæma árásina en Bandaríkin standa á sínu

Sendiherra Rússlands hjá SÞ, Vassilí Nebenzia, sakaði Bandaríkin og bandamenn þeirra um að standa með uppreisnarhópum í Sýrlandi og fara á skjön við alþjóðalög. „Það er áhugavert hvað Bretland og Frakkland munu hugsa þegar þau átta sig á því að þau hafa brotið alþjóðalög með því að vísa í stjórnarskrá Bandaríkjanna.“

Rússar dreifðu ályktunartilllögu þar sem hvatt er til þess að hernaðaraðgerðirnar gegn Sýrlandi í morgun verði fordæmdar. En sendiherra Breta í öryggisráðinu sagði, að árásirnar hefðu bæði verið réttmætar og löglegar.

Nikki Haley, sendiherra Bandaríkjanna hjá SÞ, sagði árásina hafa átt rétt á sér og sakaði Rússa um að halda fram villandi upplýsingum. „Við gáfum ríkjasamskiptum tækifæri eftir tækifæri,“ sagði hún, en að Rússar hefðu staðið í vegi fyrir aðgerðum gegn efnavopnum Sýrlands sex sinnum í öryggisráðinu

„Við getum ekki setið hjá meðan Rússland rústar þeim alþjóðlegu gildum sem við stöndum fyrir,“ sagði Haley. „Neitunarvald Rússa var notað til þess að gefa grænt ljós á að Assad notaði efnavopn.“

Hún sagði afstöðu Bandaríkjanna til ástandsins í Sýrlandi ekki hafa breyst, en að Sýrland hafi neytt þau til að grípa til aðgerða með notkun efnavopna.