Stórbruni í Kaliforníu kostaði mannslíf

Ofsafenginn stórbruni hefur breiðst út um bæinn Redding í Norður-Kaliforníu í Bandaríkjunum síðan seint í gærkvöld. Eldurinn átti upptök sín í kjarrlendi en barst þaðan í íbúðabyggð. Einn hefur látist í brunanum og hundruð íbúa hafa þurft að flýja heimili sín sökum brunans. 

Eldurinn barst í íbúðabyggð seint í gærkvöld og hefur aðeins tekist að slökkva um 6% hans. Hinn látni var verkamaður á jarðýtu sem barðist við eldinn að sögn heimildarmanns. 

Allur vesturhluti bæjarins stendur í ljósum logum, en í bænum búa um 90.000 manns. „Eldurinn breiðist svo hratt út að viðbragðsaðilar eru í óðaönn að rýma byggingar eins hratt og mögulegt er. Bæði íbúar og slökkviliðsfólk hafa slasast,“ segir talsmaður slökkviliðs á svæðinu. 

Meira en tylft mannvirkja hefur brunnið til grunna og nær eldurinn nú yfir um 11.300 hektara svæði.

 Myndskeið BBC

• Blogga um frétt