„Trúlega rákumst við saman“
Setja bókamerki
„Þetta gerðist allt í einu og mér að óvörum. Raunar átta ég mig ekki á því hvernig atburðarásin nákvæmlega var,“ segir Þorvaldur Árnason sjómaður og lyfjafræðingur. Hann var á strandveiðibátnum Höddu HF 52 sem hvolfdi út af Garðskaga í fyrrinótt. Þorvald sakaði ekki en hann lokaðist inni og fór niður þegar bátnum hvolfdi. Áður hafði honum tekist að klæða sig í björgunargalla, sem sjór flæddi inn í.
Sjómaður á nálægum bát bjargaði Þorvaldi um borð og fór með hann til Sandgerðis. Björgunarskip dró Höddu HF til hafnar og á fyrstu stigum voru þyrlusveit Landhelgisgæslunnar og nálæg skip í viðbragðsstöðu.
„Ég er búinn að hluta til að gefa skýrslu vegna þessa atviks hjá lögreglu og fer aftur. Mestu skiptir núna að ég er óslasaður og líður ágætlega,“ sagði Þorvaldur við Morgunblaðið í gær.
Lögreglan á Suðurnesjum rannsakar hvort erlenda flutningaskipið Longdawn, sem var úti af Garðskaga í fyrrinótt, eigi þátt í því að Höddu hvolfdi. Landhelgisgæslan beindi í gær Longdawn inn til hafnar í Vestmannaeyjum þar sem skýrsla var tekin af skipstjóra. Myndir sem teknar voru í Eyjum í gær sýna nýlegar skemmdir á perustefni flutningaskipsins.
„Trúlega rákumst við saman, þessi útlendi dallur og ég,“ sagði Þorvaldur Árnason. Hann kvaðst í stuttu samtali ekki geta tjáð sig um málsatvik að öðru leyti.
Hyggst skoða lög um nafnabreytingar
Myndband: Hnúfubakar komu fjölskyldu á bát á óvart
Afhendir yngri kynslóðum keflið
Skipulagði aðgerðir fyrir Ólympíuleikana
Kerfið féll á prófinu
Stafræna byltingin étur börnin sín