Bandaríkin ætla ekki lengur að fresta heræfingum á Kóreuskaganum, en ákvörðun var tekin um að fresta heræfingum á svæðinu um óákveðinn tíma eftir fund Donald Trump, forseta Bandaríkjanna, og Kim Jong-un, leiðtoga Norður-Kóreu, 12. júní.
Með því vildu Bandaríkjamenn sýna að þeim væri alvara með því að virða samkomulag sem leiðtogarnir gerðu um kjarnorkuafvopnun Norður-Kóreu. AFP-fréttastofan greinir frá.
„Við tókum ákvörðun um að fresta nokkrum stórum heræfingum til að sýna að okkur væri alvara með samkomulaginu,“ sagði Jim Mattis, varnarmálaráðherra Bandaríkjanna, á blaðamannafundi í dag. „Nú höfum við ekki í hyggju að fresta fleiri æfingum.“
Mattis sagði hins vegar ekkert um það hvernig skipulagi heræfinga á svæðinu yrði háttað, eða hvort þær væru yfir höfuð á döfinni. Þessar heræfingar hafa hins vegar vakið mikla reiði hjá stjórnvöldum í Norður-Kóreu.
„Við erum ekki að hefja æfingar að nýju núna,“ sagði Mattis jafnframt. „Við ætlum að sjá hvernig samningaviðræður þróast og taka ákvarðanir með það að leiðarljósi.“