Erlent | mbl | 10.9.2018 | 16:50 | Uppfært 23:02

Bandalag hægriflokka vill stjórnarmyndunarumboð

Formenn flokkanna sem mynda bandalag hægri flokka í Svíþjóð. AFP

Bandalag hægriflokka sækist eftir umboði til að mynda nýja ríkisstjórn í Svíþjóð. Þingkosningar fóru fram í landinu í gær og fékk bandalag hægri flokka, sem Moderaterna, Kristilegir demókratar, Miðflokkurinn og Frjálslyndi flokkurinn mynda, 143 þingsæti. Rauðgræna blokkin, sem samanstendur af Sósíaldemókrötum, Græningjum og Vinstriflokknum, hlaut 144 þingsæti.

Formenn bandalags hægri flokka funduðu í dag og greindi Ulf Kristersson, leiðtogi Moderaterna, frá því að fundi loknum að flokkarnir mundu sækjast eftir því að fá umboð til að mynda ríkisstjórn. Bandalagið þarf um þrjátíu sæti til viðbótar til að mynda meirihluta á þinginu.

Hægaibandalagið bætir við tveimur sætum frá síðustu kosningum en það má þakka Miðflokknum og Kristilegum demókrötum sem bæta við sig níu og sjö mönnum. Frjálslyndi flokkurinn stendur í stað frá síðustu kosningum en Moderaterna tapa 14.

Rauðgræna bandalagið tapar fimmtán þingsætum frá því fyrir fjórum árum, þegar það fékk 159 sæti.

Fá fordæmi eru fyrir þeirri stöðu sem komin er upp í sænskum stjórnmálum eftir kosningarnar en Grétar Þór Eyþórsson, prófessor í stjórnmálafræði við Háskólann á Akureyri, sagði við mbl.is fyrr í dag að staðan sem núna er uppi í sænskum stjórnmálum hafi blasað við í þónokkurn tíma.