„Þeir eru að reyna að brjóta Julian. Þeir vilja ganga frá honum,“ segir Kristinn Hrafnsson, ritstjóri WikiLeaks, í samtali við Der Spiegel. Þar er greint frá því að Kristinn hafi heimsótt Julian Assange, stofnanda WikiLeaks, í sendiráð Ekvadors í London í síðustu viku.
Assange hefur haldið til í sendiráði Ekvador í London síðan 2012. Þangað fór hann upphaflega til þess að forðast ákærur sænskra yfirvalda í kynferðisbrotamáli gegn honum. Saksóknarar í Svíþjóð hafa fallið frá málinu en hann hefur dvalið áfram í sendiráðinu af ótta við að verða framseldur til Bandaríkjanna.
Assange er sífellt meira einangraður innan sendiráðsins, slökkt hefur verið á nettengingu hans og símasamband hans er takmarkað. Í frétt Der Spiegel kemur fram að aðeins lögfræðiráðgjafar og aðstoðarmaður Assange fái að heimsækja hann. Blaðamönnum, vinum hans og jafnvel móður hans er meinaður aðgangur að sendiráðinu. Kristinn fékk að heimsækja Assange í síðustu viku, rétt áður en reglur um heimsóknir voru hertar. Í samtali við Spiegel lýsir Kristinn andrúmsloftinu í sendiráðinu sem afar óvinveittu og jafnvel fjandsamlegu. Þetta hafi líklega verið síðasta heimsókn hans til Assange í sendiráðið.
Talið er að hertar reglur sem Assange þarf að fara eftir í sendiráðinu, eins og að þrífa baðherbergið sitt og að hugsa betur um köttinn sinn, eigi að þrýsta á hann til að yfirgefa sendiráðið. Assange hefur sagt að hann muni ekki gefa sig fram við bresku lögregluna nema að hann fái loforð um að hann komist til Ekvador.