Allir þeir sem létust í eldsvoðanum í gistiskála Flamengo-knattspyrnufélagsins í Rio de Janeiro eru ungir að árum. Liðsmenn á aldrinum 14-17 gistu í skálanum. Sex leikmenn og fjórir starfsmenn létust. Þegar eldurinn kom upp var húsið rafmagns- og vatnslaust vegna mikillar úrkomu í borginni.
Flamengo er vinsælasta knattspyrnufélag Brasilíu og mikil ásókn ungra leikmanna að komast að hjá félaginu. Sjónvarpsstöðvar í Brasilíu sýna myndir af örvæntingarfullum foreldrum streyma að til þess að fá upplýsingar um afdrif barna sinna.
Eldurinn kom upp klukkan fimm í nótt að staðartíma og tók um tvær klukkustundir að slökkva hann. Eldsupptök eru ókunn.
Flamengo er í Vargem Grande-hverfinu og æfa leikmenn í aðalliði Flamengo einnig þar sem eldurinn kviknaði. Einhverjir fjölmiðlar segja að allir þeir sem létust hafi verið ungir leikmenn en það virðist enn vera á reiki þar sem yfirvöld hafa ekki upplýst um það.
Aftakaveður var á þessum slóðum á miðvikudagskvöldið og létust sex í óveðrinu. Vegna úrkomunnar sem fylgdi rokinu var enn rafmagns- og vatnslaust á Flamengo-svæðinu þegar eldurinn kom upp.