Erkibiskupinn í Lyon sem var dæmdur í sex mánaða skilorðsbundið fangelsi fyrir að hafa tekið þátt í að hylma yfir misnotkun og barnaníð innan kaþólsku kirkjunnar gengur á fund páfans í Róm á mánudaginn. Talið er nokkuð líklegt að erkibiskupinn Philippe Barbarin biðjist lausnar frá embætti.
Þegar dómur féll í máli hans í síðustu viku sagðist hann ætla að ganga á fund páfans. Barbarin var fundinn sekur um að láta hjá líða að tilkynna vitneskju um meint kynferðisbrot undirmanns síns til lögreglu. Nokkrum árum eftir að málið kom upp greindi hann páfagarði frá málinu.
Kynferðisbrot innan kaþólsku kirkjunnar hafa komið talsvert upp á yfirborðið á síðstu árum. Árið 2016 vísaði franskur saksóknari frá ásökunum um að erkibiskupinn Barbarin hafi vísvitandi hylmt yfir kynferðisbrot kaþólsks prests gagnvart ungum drengjum.