Öldungadeild Bandaríkjaþings samþykkti við atkvæðagreiðslu í kvöld að afnema neyðarástandið við landamæri landsins og Mexíkó en áður hafði fulltrúadeildin greitt atkvæði með sama hætti.
Tólf þingmenn Repúblikanaflokksins kusu með demókrötum en alls kusu 59 með tillögunni en 41 var á móti. Repúblikanar eru í meirihluta í öldungadeild en demókratar í fulltrúadeild.
Fram kemur í frétt AFP að tveir þriðju þingmanna beggja þingdeilda þurfi að greiða atkvæði með frumvörpum svo forsetinn geti ekki beitt neitunarvaldinu en Trump lýsti því yfir á Twitter að hann muni beita neitunarvaldinu.
I look forward to VETOING the just passed Democrat inspired Resolution which would OPEN BORDERS while increasing Crime, Drugs, and Trafficking in our Country. I thank all of the Strong Republicans who voted to support Border Security and our desperately needed WALL!
— Donald J. Trump (@realDonaldTrump) March 14, 2019
Trump lýsti yfir neyðarástandi á landamærum Bandaríkjanna og Mexíkó í þeim tilgangi að tryggja meira fjármagn til mannvirkjagerðar á landamærum Bandaríkjanna og Mexíkó um miðjan febrúar.
Forsetinn hafði áður samþykkt málamiðlunartillögu sem þingmenn úr báðum flokkum stóðu að, þar sem demókratar féllust á að verja mætti tæplega 1,4 milljörðum Bandaríkjadala í nýjar girðingar á landamærunum í stað þeirra 5,7 milljarða sem Trump og repúblikanar vildu fá.
Um leið þýddi málamiðlunin að hluti bandarískra ríkisstofnana myndi áfram fá fjármögnun og þær þyrftu því ekki að loka, líkt og þær gerðu í desember.