Emmanuel Macron Frakklandsforseti sagði frönsku þjóðina í heild finna til við að sjá Notre Dame kirkjuna í París í ljósum logum.
„Líkt og allir landar mínir, þá hryggir það mig að sjá þennan hluta okkar brenna,“ hefur BBC eftir Macron er hann var á leið á brunastað.
Eldur kom upp í þaki kirkjunnar síðdegis í dag. Stærsta turnspíra kirkjunnar er nú hrunin og logar allt þak kirkjunnar. BBC hafði eftir talsmanni kirkjunnar að öll byggingin væri að brenna. „Það verður ekkert eftir,“ sagði hann.
Macron hafði áður tilkynnt að hann myndi fresta fyrirhugaðri ræðu sinni um tillögur til úrbóta í kjölfar mótmæla sem kennd hafa verið við gul vesti og staðið hafa yfir í landinu í fimm mánuði.
Macron er ekki einn um að syrgja Notre Dame, því Angela Merkel Þýskalandskanslari sagði kirkjuna vera táknmynd evrópskrar menningar. „Eldurinn í Notre Dame hittir okkur beint í hjartastað,“ sagði þá í yfirlýsingu frá þýska utanríkisráðuneytinu.
Donald Trump Bandaríkjaforseti tjáði sig um málið, líkt og svo oft áður, á Twitter. Lagði forsetinn í færslu sinni til að flogið yrði með vatnsbelgi og vatninu sleppt yfir kirkjuna. „“Hræðilegt að horfa á þennan miikla eld í Notre Dame dómkirkjunni í París,“ sagði Trump og bætti við að bregðast yrði fljótt við.
Sadiq Khan, borgarstjóri London, segir borgarbúa þar syrgja með Parísarbúum vegna brunans. „Það sker hjartað að sjá Notre Dame brenna,“ sagði Khan á Twitter. „London syrgir með París í dag og stendur við hlið hennar með ævarandi vináttu.“
UNESCO, menningastofnun Sameinuðu þjóðanna, lýsti því þá yfir síðdegis að stofnunin stæði með Frakklandi í því að bjarga og endurbyggja kirkjuna, sem teljist „ómetanlegar menningaminjar“.
Sagði Audrey Azoulay, yfirmaður UNESCO, stofnunina nú fylgjast með tilraunum til að ráða niðurlögum eldsins, en Notre Dame hefur verið á heimsminjaskrá UNESCO frá 1991.