Sviðin jörð í sænskri vínbúð

Ekki var feitan gölt að flá í Systembolaget í Strömstad, ...
Ekki var feitan gölt að flá í Systembolaget í Strömstad, skammt frá landamærum Svíþjóðar og Noregs, tíu mínútum fyrir lokun í gær en þá höfðu páskaþyrstir Norðmenn látið þar greipar sópa sem enginn væri morgundagurinn. Sá sem hér skrifar hefur séð hillurnar í Strömstad svigna undan töluvert meira magni en sést á myndunum en þar má kaupa kassavín („belju“) á 150 norskar krónur en algengt verð í Vinmonopolet í Noregi er 340 krónur svo eðlilegt er að margur guðhræddur Norðmaðurinn freistist til að fara með „aðeins of mikið“ með sér til baka sem telst einmitt hæfilegur skammtur um páskana. Ljósmynd/Magnus Schaft

„Ég sparaði mér tíma með því að panta fyrir fram á netinu. Maður lærir nú hvernig kaupin ganga fyrir sig á eyrinni þegar maður fer oft yfir að versla,“ segir Magnus Schaft, 36 ára gamall verkefnisstjóri hjá upplýsingatæknifyrirtæki í Sarpsborg í Noregi, í samtali við mbl.is nú síðdegis.

Tilefnið er mynd og frásögn sem Schaft birti á Facebook-síðu sinni af því þegar hann ók til Strömstad í Svíþjóð í gær og kom í áfengisverslunina þar, Systembolaget, tíu mínútum fyrir lokun. Hafði þá norskur „innrásarher“ bókstaflega látið greipar sópa í versluninni fyrir páskana enda mætti stanslaus umferðarstraumur bifreiða á norskum númerum Schaft þegar hann ók yfir til Svíþjóðar.

Ekki er ofsögum sagt að Svíar geri út á landamæraverslun við nágranna sína í Noregi enda kostar áfengið Svíþjóðarmegin helminginn af því sem það kostar í Vinmonopolet í Noregi. Strömstad er ekki stór bær, þar búa rúmlega 7.000 manns sem skilar sveitarfélaginu í 167. sæti í stærðarröð sænskra sveitarfélaga.

Selja 475,3 lítra á hvern íbúa en 31,5 í Stokkhólmi

Hins vegar eru tvær áfengisútsölur í Strömstad og önnur þeirra með þeim allra stærstu í landinu, samtals má ganga um 1.500 fermetra af áfengisverslunarhúsnæði í Strömstad enda hefur áfengisverslun Norðmanna í þessu litla huggulega bæjarfélagi við sjávarsíðuna margfaldast síðustu ár og segir kannski meira en mörg orð að í Strömstad voru árið 2016 seldir 475,3 lítrar af áfengi á hvern íbúa 15 ára eða eldri en samsvarandi tölur frá höfuðborginni Stokkhólmi voru 31,5 lítrar og í Ósló, höfuðborg Noregs, seldi Vinmonopolet 22,8 lítra á hvern íbúa 15 ára og eldri árið 2016.

„Ég er ákaflega sólginn í góðan kalifornískan bjór,“ segir Schaft við mbl.is, „eitt merkjanna sem ég kaupi kostar 22 norskar krónur í Systembolaget [í Svíþjóð] og 45 krónur í Vinmonopolet [Noregsmegin]. Þar með spara ég rúmlega 400 krónur [tæpar 5.700 ISK] þegar ég kaupi þennan nánasarlega toll sem er 19 flöskur,“ útskýrir hann og þarf ekki hagfræðing til að sjá að Svíþjóðarförin borgar sig, einkum fyrir þá sem búa steinsnar frá landamærunum eins og Schaft í Sarpsborg og allir íbúar Óslóar og nágrennis.

Schaft bætir því við að reyndar sé leyfilegt magn bara sex bjórflöskur en heimildina megi drýgja með því að kaupa ekki sterkt vín, létt vín eða tóbak.

Veldisvöxtur í Svíþjóðarverslun Norðmanna

„Ég er reyndar að fara aftur til Strömstad um páskana að heimsækja vini en þá er Systembolaget lokað vegna þess að ástandið þar verður klikkun sé opið Svíþjóðarmegin en ekki í Noregi um helgidaga,“ segir Schaft enn fremur en hvorar tveggja verslananna, Noregs- og Svíþjóðarmegin, eru þó opnar á laugardaginn.

Greint var frá páskasmygli frá Svíþjóð til Noregs á mbl.is fyrr í dag en tölur norsku tollgæslunnar frá því í október 2017 tala sínu máli um stóraukna landamæraverslun, ferðir sem Norðmenn kalla í daglegu tali „harryturer“ en slangrið „harry“ rekur uppruna sinn til öndverðrar 20. aldar og táknar persónu úr verkalýðsstétt eða einhvern sem hefur lélegan smekk og lætur bjóða sér að kaupa óvandaða eða óekta vöru gegn lægra kaupverði. Þá, í október 2017, höfðu tollverðir Noregsmegin lagt hald á 46.881 lítra af smygluðu áfengi fyrri helming ársins á móti 32.969 á sama tímabili árið áður.

„Tölfræðin segir okkur það bara að mörg hundruð þúsund Norðmenn flykkjast til Strömstad til að kaupa áfengi,“ segir Schaft að skilnaði og iðar væntanlega í skinninu að opna fyrstu flöskuna af kaliforníska bjórnum sínum og leyfa helgidómi páskanna að hellast yfir sig í boði sænskra áfengisverslana.

mbl.is
FJÖLNOTAKERRUR _ STURTUKERRUR
Fjölnotakerrur, auðvelt er að koma bílum og vélum uppá, 4 til 6 metra langar. St...
EIGUM ALLSKONAR STIGA Á LAGER
Sjá fjölmargar gerðir á: http://www.sogem-sa.com/stairs Sími 615 1750 Sjá einni...
Málningar- og viðhaldsvinna
Getum bætt við okkur inni- og útiverkefnum. Vönduð vinnubrögð og góð umgengni. T...
Kisudagurinn í Kattholti 1.júní n.k. kl.12
Haldinn verður markaður til styrktar athvarfinu Stangarhyl 2, 110 Rvík og verður...