Tveir unglingsdrengir sem kanadíska lögreglan hefur lýst eftir vegna morðrannsókna fundust látnir í norðurhluta Manitoba í síðustu viku. Krufning gefur til kynna að drengirnir hafi framið sjálfsmorð með skotvopni. BBC greinir frá.
Drengirnir Kam McLeod, 19 ára, og Bryer Schmegelsky, 18 ára, voru á flótta í rúmar þrjár vikur og ekkert hafði sést til þeirra, svo vitað sé, frá 22. júlí.
Fyrst var tilkynnt um að McLeod og Schmegelsky væri saknað 19. júlí, eftir að pallbíll þeirra fannst í ljósum logum nærri Dease-stöðuvatninu í Bresku-Kólumbíu, tæpa tvo kílómetra frá þeim stað þar sem líkið af háskólakennaranum Leonard Dyck fannst.
Nokkrum dögum síðar greindi kanadíska lögreglan frá því að McLeod og Schmegelsky væru einnig grunaðir um morðið á hinni bandarísku Chynna Deese og Ástralanum Lucas Fowler, en þau fundust myrt um 500 kílómetrum frá þeim stað þar sem lík Dyck uppgötvaðist.
Lík drengjanna fundust fyrir helgi og í yfirlýsingu lögreglu sem gefin var út í dag kemur fram að þeir höfðu verið látnir í nokkra daga þegar þeir fundust. Tvær byssur fundust í fórum drengjanna og verið er að rannsaka hvort þær tengist morðunum á þremenningunum.