Lík hefur fundist við leit að hinni 15 ára gömlu Noru Quoirin sem hvarf fyrir 10 dögum af hótelherbergi sínu. Talið er líklegt að um lík unglingsins sé að ræða. Það hefur þó ekki verið staðfest.
Leitarteymi hafa kembt regnskógasvæði sem umlykur Dusun-hótelið hvar Nora var í fríi með fjölskyldu sinni. Fjölskyldan kom til Malasíu 3. ágúst og morguninn eftir þegar foreldar Noru vöknuðu, var Nora horfin og glugginn að herbergi hennar opinn. Telja foreldar Noru að henni hafi verið rænt.
Yfir 350 manns hafa leitað hennar í þéttum regnskóginum í útjaðri Kuala Lumpur. Hafa þyrlur, drónar, leitarhundar og kafarar verið notað við leitina. Þá stjórnuðu seiðmenn helgiathöfnum í tilraun sinni til að finna stúlkuna.
The Lucie Blackman Trust, bresk góðgerðarsamtök sem veita fjölskyldum Breta sem týnast erlendis stuðning, staðfestu að lík hafi fundist.
„Á þessum tímapunkti getum við ekki staðfest að þetta sé Nora. Samt sem áður er það því miður líklegt. Nú er verið að staðfesta hvern um ræðir og dánarorsök,“ segir í yfirlýsingu samtakanna.
Foreldar Noru Quiorin buðu í gær 10 þúsund pund, eða því sem nemur tæplega einni og hálfri milljón íslenskra króna, fyrir upplýsingar um hvarf dóttur þeirra.
Nora fæddist með heilkenni sem kallast holoprosencephaly og er fágæt röskun sem hefur áhrif á þróun heilans. Samskiptahæfileikar Noru eru takmarkaðir og hún á erfitt með að lesa og skrifa meira en nokkur orð. Þá hefur heilkennið einnig áhrif á jafnvægi hennar og hún á erfitt með samhæfingu.
Fjölskylda Noru hefur sagt það nánast ómögulegt að Nora hafi látið sig hverfa af sjálfsdáðum.
„Nora er afar sérstök manneskja. Hún er skemmtileg og fyndin og einstaklega kærleiksrík. Henni finnst gaman að segja okkur sniðuga brandara og klæðast snjöllum, litríkum stuttermabolum. Hún er ekki eins og aðrir unglingar. Hún er ekki sjálfstæð og fer ekkert ein,“ sögðu foreldar hennar í síðustu viku.
Lögregla hefur yfirheyrt fjölda fólks og skoðað fingraför sem fundust á herbergisglugga Noru. Þá hafa frásagnir þorpsbúa sem segjast hafa heyrt í flutningabíl snemma morguns daginn sem Nora hvarf, einnig verið rannsakaðar. Málið er rannsakað sem mannshvarf.