Andrew Bretaprins sást fá fótanudd frá ungri konu í íbúð auðkýfingsins og barnaníðingsins Jeffrey Epstein í New York. Guardian segir þetta koma fram í tölvupóstsamskiptum vel þekkts bandarísks umboðsmanns rithöfunda og rithöfundarins Evgeny Morozov.
Í yfirlýsingu sem konungshöllin sendi frá sér fyrr í vikunni sagði Andrew sér blöskra ásakanir um kynferðislegt ofbeldi tengt Epstein. Yfirlýsingin var send frá höllinni eftir að myndskeið sem á að sýna prinsinn á heimili barnaníðingsins árið 2010 var birt.
Samskipti þeirra Morozov og umboðsmannsins John Brockman voru fyrst birt í tímaritinu New Republic. Þar segir frá því að Brockman hafi hvatt Morozov til að hitta Epstein og kallar hann „vísinda mannvin og milljarðamæring“ sem hafi verið „verulega gjafmildur við að fjármagna verkefni fyrir marga vini okkar og viðskiptavini“.
Í grein sem Morozov birtir í tímaritinu kveðst hann vera við það að skera á tengsl sín við Brockman vegna þagnar þess síðarnefnda um kynni sín af Epstein frá því hann var fyrst handtekinn árið 2013 og hvetur aðra rithöfunda til að gera slíkt hið sama.
Morozov birtir m.a. tölvupóst sem Brockman sendi honum í september 2013 og þar sem hann rifjar upp heimsókn á sína á heimili Epstein á Manhattan.
„Síðast þegar ég kom heim til hans ...þá gekk ég inn á hann í jogginggalla og breskan gaur í jakkafötum með axlabönd vera að fá fótanudd frá tveimur ungum, vel klæddum rússneskum konum,“ skrifaði Morozov.
„Eftir að hafa yfirheyrt mig um netöryggi þá fór Bretinn, sem var kallaður Andy, að tjá sig um sænsk yfirvöld og ákærurnar gegn Julian Assange. „Það halda allir að þeir séu svo frjálslyndir í Svíþjóð, en þeir eru í raun líkari Norður-Englandi en Suður-Evrópu,“ rifjar Brockman upp að „Andy“ hafi sagt.
Brockman segir Andy því næst hafa kvartað yfir opinberri ímynd sinni. „Í Mónakó vinnur Albert 12 tíma á dag, en klukkan níu þegar hann fer út þá getur hann gert það sem hann vill og öllum er sama. Ef ég geri það sama þá er ég í miklum vanda“,“ segir Brockman í pósti sínum Andy hafa sagt. Það var á þeim tímapunkti bætir hann svo við „sem ég áttaði mig á því að sá sem var að fá fótanudd frá Irinu var hans konunglega hátign Andrew Bretaprins, hertoginn af Jórvík.“
Brockman lauk svo frásögn sinni af tengslum prinsins af Epstein viku síðar í tölvupósti til Morozov þar sem hann segir að á fréttalitlum degi hafi heilsíðu mynd birst í New York Post af þeim Epstein og Andrew á göngu í Central Park undir fyrirsögninni „Prinsinn og Pervertinn“og þar með hafi hlutverki Andrews sem sérstakur viðskiptasendiherra Bretlands lokið.
Epstein fannst látinn í fangaklefa sínum 10. ágúst en hann beið réttarhalda þar sem hann var meðal annars ákærður fyrir kynferðislegt ofbeldi gagnvart barni og kynlífsmansal á börnum.
Dánardómstjóri hefur úrskurðað að um sjálfsvíg hafi verið að ræða. Epstein átti marga þekkta vini svo sem Donald Trump, forseta Bandaríkjanna, og Bill Clinton, fyrrverandi forseta Bandaríkjanna.