Bandarískur sjóherliði skaut tvo til bana áður en hann fyrirfór sér í herstöð Bandaríkjanna í Pearl Harbor á Havaí í gær.
Árásin var gerð um miðjan dag að staðartíma en árásarmaðurinn særði einn til viðbótar. Ekki er vitað hvers vegna maðurinn réðst gegn samherjum sínum.
Útgöngubann var í herstöðinni í rúma klukkustund eftir árásina.
Yfirmaður herstöðvarinnar sagði á blaðamannafundi að ástæður árásinnar væru óljósar en bandaríski herinn rannsakar málið.
Um helgina verður þess minnst að 78 ár eru liðin frá árás japanska hersins á Pearl Harbor en rúmlega 2.300 Bandaríkjamenn létu lífið í árásinni.