Hryðjuverkamenn Ríkis íslams hafa gefið út myndband sem sýnir aftöku 11 kristinna einstaklinga í norðausturhluta Nígeríu. Myndefnið var sett á veraldarvefinn seint í gærkvöldi af Amaq-armi hryðjuverkasamtakanna. 

Í myndbandinu eru ellefu einstaklingar með bundið fyrir augun skotnir og stungnir til bana á ótilgreindum stað. „Þetta eru skilaboð til allra kristinna manna í heiminum,“ segir grímuklæddur maður í myndbandinu sem er einnar mínútu langt. Maðurinn fullyrðir að morðin séu í hefndarskyni fyrir dauða Abu Bakr al-Baghdadi. 

Bandarískir sérsveitarmenn eltu Baghdadi uppi í Norðvestur-Sýrlandi í lok október og réðust á fylgsni hans. Baghdadi flúði inn í göng og sprengdi sjálfan sig og tvö ung börn í loft upp með sjálfsvígsvesti sem hann klæddist. Baghdadi var útnefndur leiðtogi Ríkis íslams árið 2014, en eftir andlát hans hafa samtökin útnefnt nýjan leiðtoga. 

Á undanförnum mánuðum hafa sveitir Ríkis íslams í Vestur-Afríku fjölgað árásum á kristið fólk, öryggissveitir og starfsmenn hjálparsamtaka. Á áratug hafa 36.000 manns látist og um tvær milljónir borgara þurft að yfirgefa heimilis sín í Nígeríu vegna uppgangs hryðjuverkasveita í landinu.

Tengdar fréttir

Ríki íslams

Scholz vill herða vopnalöggjöf í kjölfar árásar

• Heimsækir borg þar sem hnífaárás var gerð
• Hryðjuverkasamtök heilla unglinga á Tiktok
• Íslenskur netþjónn hýsti hryðjuverkaáróður
• Neita að tjá sig um Ríki íslams

» Fleiri tengdar fréttir

• 1 blogg um fréttina

Bloggað um fréttina

• Kristin stjórnmálasamtök: Öfgaislamskur óhugnaður í formi fjöldamorðs einu sinni enn