Herinn mun taka þátt í því að koma aðstoð til fólks sem þarf á því að halda í Frakklandi segir forseti Frakklands, Emmanuel Macron. Yfir 1.300 einstaklingar hafa látist úr kórónuveirunni þar í landi.
Frakkland hefur, líkt og svo mörg önnur ríki, komið á útgöngubanni og hefur skólum og veitingastöðum verið lokað í þeirri von að hægt verði að stöðva útbreiðslu veirunnar. Öll óþarfa ferðalög eru bönnuð og aðeins heimilt að fara í verslanir til að kaupa nauðsynjar og að hreyfa sig í næsta nágrenni við heimili sitt.
Hernaðaraðgerðin nefnist Resilience og beinist einkum að því að veita aðstoð og styðja almenning sem og að veita aðstoð við opinbera þjónustu segir Macron. Á þetta bæði við meginland Frakklands sem og franskar eyjar.
„Samstaða og hugrekki mun koma okkur í gegnum þetta. Við erum enn á upphafsreit en munum þrauka, segir Macron og ítrekaði enn og aftur að Frakkland ætti í stríði.
Macron heimsótti bráðabirgðasjúkrahús í Mulhouse-héraði í gær en ástandið er mjög slæmt í héraðinu vegna veirunnar. „Öll þjóðin hefur verið kölluð til starfa í baráttunni við farsóttina,“ sagði Macron við starfsfólk þar og hét um leið því að aukið fé yrði sett í sjúkrahús landsins og rekstur þeirra.
Dregið verður verulega úr þjónustu neðanjarðarlesta (métro) og lesta í París (RER) og úthverfum og verður tveimur flugvöllum borgarinnar einnig lokað á sama tíma og reglur varðandi samkomubann verða hertar enn frekar.
Markmiðið er að starfsemi lestarkerfa verði nægjanleg til þess að koma heilbrigðisstarfsmönnum og öðrum framlínustarfsmönnum til vinnu á meðan kórónufaraldurinn geisar. Lögreglan er með eftirlit á lestarstöðvum til að koma í veg fyrir að fólk leggi upp í ónauðsynleg ferðalög. Ekki síst fólk sem vill forða sér út úr einangrun stórborganna.
Flugvallarfyrirtækið ADP hefur tilkynnt að það muni loka Orly-flugvelli tímabundið en hann er helsti flugvöllur landsins hvað varðar innanlandsflug. Á þriðjudag hafði umferð um flugvöllinn minnkað um 92% og flugumferð um Charles de Gaulle hafði dregist saman um 89% en hann er helsti millilandaflugvöllur Frakklands. Áður hafði ADP lokað nánast öllum flugafgreiðslusölum flugvallanna vegna þess hversu dregið hefur úr flugferðum til og frá Orly og CDG.
Heilbrigðisyfirvöld í Frakklandi greindu frá því í gær að 1.331 hafi látist af völdum kórónuveirunnar frá því fyrsta smitið kom upp þar í landi í janúar. Yfir 11.500 hafa greinst með veiruna, að því er segir í frétt AFP-fréttastofunnar.
Frakkar hafa á hverju kvöldi farið út á svalir eða út við glugga heimila sinna og klappað fyrir heilbrigðisstarfsmönnum. Í gærkvöldi var kirkjuklukkum einnig hringt, þar á meðal í Sacré-Cœur dómkirkjunni, í tíu mínútur. Með þessu vildu kirkjur landsins sýna samstöðu þjóðarinnar og minnast þess er Gabríel erkiengill birtist Maríu mey og tilkynnti henni að hún myndi fæða einkason Guðs, Jesú.