Erlent | AFP | 29.9.2020 | 6:49 | Uppfært 8:34

Fyrrverandi kosningastjóri Trumps handtekinn

Kosningastjórinn fyrrverandi handtekinn fyrir utan heimili sitt á sunnudag. AFP

Fyrrverandi kosningastjóri Donalds Trumps var handtekinn á sunnudag fyrir utan heimili sitt í Flórída. Hann var rekinn frá framboðinu í júlí þegar vinsældir Trumps fóru að dala.

Að sögn lögreglu var kosningastjórinn fyrrverandi, Brad Parscale, með tíu byssur á heimilinu en húsleit var gerð þar eftir að handtökuna í kjölfar þess að eiginkona hans tilkynnti um heimilisofbeldi.

Frétt af mbl.is

Trump skiptir um kosningastjóra

Parscale hafði gengið í skrokk á eiginkonu sinni og hótað að fremja sjálfsvíg á sunnudag þegar lögregla var kölluð á vettvang í Fort Lauderdale. Á myndum úr myndavél sem lögreglan var með á sér sést eiginkona Parscale, Candice, fyrir utan húsið á sundfatnaði að ræða við lögreglu. Hún heyrist segja að Parscale hafi látið eins og brjálæðingur og væri með hlaðna skammbyssu.

Mynd úr myndavél lögreglu af Brad Parscale fyrir utan heimili sitt í Flórída á sunnudag. AFP

Síðan sést Parscale koma út úr húsinu, ber að ofan og með bjórdós í hendi. Vopnaðir lögregluþjónar þvinguðu hann niður á jörðina og handjárnuðu. Heyrist Parscale endurtaka ítrekað „Ég gerði ekkert.“

Samkvæmt lögreglu var hann drukkinn og að sögn eiginkonu Parscale hefur hann verið ofbeldishneigður undanfarnar vikur. Í lögregluskýrslu kemur fram að lögreglumenn hafi tekið eftir áverkum á báðum handleggjum hennar, vanga og enni. Þegar hún hafi verið spurð hvernig hún hafi fengið áverkana hafi hún svarað að Parscale hafi barið hana.

Brad Parscale handtekinn af lögreglu á sunnudag. AFP

Á heimili Parscale fundust sex skammbyssur, tveir rifflar og tvær haglabyssur. Hann var lagður inn á geðdeild eftir handtökuna. Þrátt fyrir að hafa verið settur af sem kosningastjóri í júlí hefur hann verið einn helsti stjórnandi framboðs Trumps.