Erlent | mbl | 28.12.2020 | 9:50 | Uppfært 15:10

8 mínútur og 46 sekúndur sem breyttu heiminum

Í lok maí komst myndband í dreifingu á netinu þar sem lögreglumaðurinn Derek Chauvin lét þyngd sína hvíla á hálsi George Floyd í 8 mínútur og 46 sekúndur við handtöku. Floyd lét lífið og í kjölfarið hófst ein mesta alda mótmæla seinni tíma í Bandaríkjunum.

Hinn 46 ára gamli George Floyd hafði misst vinnuna þegar faraldur kórónuveirunnar skall á og hafði farið til að kaupa sígarettur á heitu mánudagskvöldi í Minneapolis. Til þess hafði hann notað falsaðan 20 dollara seðil. Lögreglan var kölluð til og afleiðingarnar þekkja flestir. Í myndbandinu heyrist Floyd ítrekað kalla: „Ég get ekki andað,“ setning sem átti eftir að verða nokkurs konar slagorð fólks í Bandaríkjunum og um heim allan þar sem ofbeldi lögreglu í Bandaríkjunum gagnvart svörtu fólki var fordæmt.

Black Lives Matter-hreyfingin sem upphaflega byrjaði árið 2013 varð háværari en nokkru sinni fyrr. Ákall fólks var að lækka framlög til lögreglunnar í Bandaríkjunum og nýta fjármunina heldur til að fjárfesta í samfélagi svartra.

Blaðamenn New York Times rýna í málið í myndskeiðinu sem fylgir og rekja atburðarásina sem leiddi Floyd til dauða ítarlega.

mbl.is mun á milli jóla og nýárs birta skýringar af þessu tagi sem New York Times hefur gert fyrir alla mánuði þessa viðburðaríka árs. Kórónuveiran er þar fyrirferðarmikil en önnur stór fréttamál á árinu eru einnig til skoðunar líkt og forsetakosningarnar í Bandaríkjunum.