Fimm ára drengur sem komst lífs af þegar kláfur hrapaði til jarðar á Ítalíu í maí er nú kominn af sjúkrahúsi og segja læknar ástand hans vera mun betra.
Drengurinn var sá eini sem komst lífs af úr slysinu þar sem 14 létust. Á meðal látinna voru báðir foreldrar hans, bróðir og langamma og langafi. Fjölskyldan var frá Ísrael.
Drengurinn hlaut áverka á bringu og kvið en er nú kominn til síns heima í Pavia, suður af ítölsku borginni Mílanó, með frænku sinni.
Í yfirlýsingu frá barnaspítalanum í Tórínó þar sem drengurinn hefur legið síðan slysið varð 24. maí segir að ástand hans sé mun betra en fullur bati muni taka um tvo mánuði í viðbót.
Rannsókn á orsökum slyssins leiddi í ljós að neyðarhemlar á kláfinum, sem hefðu getað komið í veg fyrir slysið, voru gerðir óvirkir. Þrír menn voru handteknir vegna slyssins; eigandi fyrirtækisins sem rekur kláfinn, rekstrarstjóri og verkfræðingur. Þeim var síðar sleppt úr haldi.
Rekstrarstjórinn er í stofufangelsi en hann viðurkenndi að hafa gert neyðarhemlanna óvirka vegna endurtekinna bilana.