Frans páfi er nú betri til heilsunnar en hann var í gær þegar hann var lagður inn á sjúkrahús vegna öndunarfærasýkingar og erfiðleika við öndun. Páfinn hefur sinnt störfum sínum frá sjúkrahúsinu í morgun, að sögn talsmanns hans.
„Páfinn hvíldist vel í nótt. Klínískt mat lítur betur út og hann heldur áfram þeirri meðferð sem lagt var upp með. Eftir morgunverð las hann dagblöð og sinnti vinnu sinni,“ segir Matteo Bruni, talsmaður páfa, í yfirlýsingu.
Í kjölfar innlagnarinnar hafa áhyggjur af heilsu páfans þó stigmagnast en Frans hefur þurft að notast við göngustaf og hjólastól um nokkurt skeið vegna verkja í hné. Hann á einnig við ristilvandamál að stríða og þurfti að gangast undir aðgerð á lunga þar sem hluti annars lungans var skorinn burt, ungur að aldri.
Frans hefur þegar skrifað undir yfirlýsingu um að hann segi sig frá embættinu verði hann of veikur til að sinna skyldum sínum.