Fréttaskýring: Lántakar með frystingu inn í sumarið

Fjölmargir bíleigendur, sem tóku erlend myntkörfulán fyrir kaupum sínum á síðustu árum, hafa nýtt sér möguleika fjármögnunarfyrirtækjanna á frystingu lána eða annars konar skuldbreytingu. Flest hafa fyrirtækin þá skilmála að lánin þurfa að vera í skilum til að verða fryst.

Samkvæmt tölum frá Umferðarstofu eru um 70 þúsund ökutæki í landinu skráð í eigu bílafjármögnunarfyrirtækja og lauslega má ætla að á bilinu 25-30 þúsund bíleigendur hafi nýtt sér möguleika á einhvers konar skuldbreytingu. Útistandandi bílalán eru á bilinu 150-160 milljarðar króna en ekki allt í erlendri mynt. Þeir sem tóku innlend lán að einhverju eða öllu leyti hafa í litlum mæli nýtt sér frystingu.

Samkvæmt upplýsingum frá fyrirtækjunum hafa vanskil eitthvað aukist og sitja þau uppi með mun fleiri ökutæki en fyrir banka- og gengishrunið í haust.

Reyna fyrirtækin að koma bílunum aftur í umferð, ýmist sjálf eða gegnum bílasölur. Gengur það upp og ofan þar sem sala notaðra og nýrra bíla er mjög treg um þessar mundir. Sem dæmi um aukna vörslusviptingu má nefna að í lok febrúar sl. hafði Íslandsbanki Fjármögnun fengið til baka 140 bíla frá áramótum og nú er sú tala komin upp í 250. Skipta þessir bílar einnig hundruðum hjá flestum öðrum fyrirtækjum en þau hafa annars ekki verið viljug að gefa þessar upplýsingar.

Framlengt í átta mánuði

Fyrirtækin hafa verið að lengja tímann sem hægt er að frysta eða skuldbreyta lánum, allt upp í átta mánuði. Leiðirnar eru þó mismunandi eftir fyrirtækjum. Þannig er Avant með þrjá valkosti, sem allir gera ráð fyrir að haldið sé áfram að greiða vextina af láninu næstu átta mánuði. Í fyrsta lagi að greiða 33% af afborgunarhlutanum og þá lengist lánið um fimm mánuði, í öðru lagi að greiða 50% og þá lengist lánstíminn um fjóra mánuði og í þriðja lagi að greiða 66% hluta og þá bætast tveir mánuðir við lánstímann.

SP-Fjármögnun hefur síðan í febrúar boðið sínum viðskiptavinum að greiða sambærilega mánaðargreiðslu og í upphafi samnings, að viðbættum 25% í allt að átta mánuði. Lengist lánið sem því nemur.

Frekari veiking áhyggjuefni

Hjá Íslandsbanka Fjármögnun, fengust þær upplýsingar, að af um 15 þúsund lántakendum hefðu um 2.400 nýtt sér lækkun á afborgunum bílasamninga. Um er að ræða lækkun á greiðslum í átta mánuði og lengingu á samningi um fjóra mánuði. Er upphæðin þá föst greiðsla þennan tíma og um helmingur af fullri greiðslu eins og hún var í janúar sl. Er þetta svipuð leið og Lýsing býður upp á en lengingartími er skemmri hverju sinni, eða þrír mánuðir fyrsta kastið, og síðan 75% hlutfall í næstu þrjá mánuði.

„Hin mikla veiking krónunnar er að valda okkar viðskiptavinum miklum erfiðleikum og áframhaldandi veiking er vissulega áhyggjuefni,“ segir Már Másson, upplýsingafulltrúi Íslandsbanka, en bendir á samt sé langstærstur hluti viðskiptavina bankans í skilum með bílalánin, vanskilahlutfallið upp á 1,6%. Þeir sem nýti sér úrræði bankans geti lækkað greiðslubyrðina töluvert.

Hækkun á bílaláni*

2.000.000 Lán tekið 1. nóv. 2007
3.507.000 Eftirstöðvar í maí 2009
42.577 Afborgun 15. des. 2007
84.847 Afborgun 15. maí 2009
43.061 Afborgun 15. maí 2009 m.v. 50% frystingu

*Lán í 50% jen og 50% svissn. fr.

Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:

Bloggað um fréttina

Kauptu vikupassa

Lestu meira með vikupassa!

Fáðu þér vikupassa fyrir 1.990 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »