Guðrún Björk Bjarnadóttir, framkvæmdastjóri Sambands tónskálda og eigenda flutningsréttar (STEF), segir samtökin ætla að kæra lögregluna á höfuðborgarsvæðinu fyrir aðgerðarleysi gegn deiliskrársíðum á borð við Deildu. Kom þetta fram í máli hennar á málfundi um hugverkarétt sem haldinn var í Háskóla Íslands.

„Við höfum ákveðið að kæra aðgerðarleysi lögreglunnar. Ástæða þess er sú að árið 2012 kærðum við forsvarsmenn Deildu.net fyrir brot á höfundarrétti en síðan þá hefur ekkert gerst,“ segir Guðrún Björk í samtali við mbl.is en að kærunni standa, auk STEF, Samband flytjenda og hljómplötuframleiðenda (SFH), Samband íslenskra kvikmyndaframleiðenda (SÍK) og Félag rétthafa í sjónvarps- og kvikmyndaiðnaði (FRÍSK) sem áður voru Samtök myndrétthafa á Íslandi (SMÁÍS).

„Við lögðum á sínum tíma fram umtalsverðar sannanir og gögn inn á borð lögreglu en síðan þá hefur í raun ekkert gerst,“ segir hún og bendir á að áðurnefnd rétthafasamtök séu nú með sameiginlegan lögmann og vinnur hann nú að kærunni.

Spurð hvenær hún eigi von á því að kæran verði lögð fram á hendur lögreglu svarar Guðrún Björk: „Mér skilst að þetta sé á lokametrunum og á ég því von á að kæran verði lögð fram á allra næstu dögum - jafnvel í næstu viku.“

Rétthafasamtökin hafa að undanförnu náð samkomulagi við helstu fjarskiptafyrirtæki landsins um framkvæmd lögbanns á veitingu aðgangs að vefsíðunum deildu.net og the PirateBay, en síðurnar deildu afþreyingarefni til notenda sinna.

Guðrún Björk Bjarnadóttir framkvæmdastjóri STEF.

Tengdar fréttir

Höfundarréttarvarið efni á netinu

Hæstiréttur staðfestir lögbann

• Skoða að áfrýja málinu til Hæstaréttar
• Héraðsdómur staðfestir lögbann vegna deildu og piratebay
• Segja Jens gera úlfalda úr mýflugu
• Lögbannið „gagnslaust og skaðlegt“

» Fleiri tengdar fréttir

• 1 blogg um fréttina

Bloggað um fréttina

• Ómar Ragnarsson: Athyglisverð ummæli Baltasar Kormáks og fleiri.