Ásta Kristín Andrésdóttir hjúkrunarfræðingur, sem ákærð var fyrir að valda dauða sjúklings sem var í hennar umsjón á Landspítalanum en var seinna sýknuð, hefur gert bótakröfu á hendur íslenska ríkinu vegna fjártjóns og miska sem hún varð fyrir vegna sakamálarannsóknar og ákæru á hendur henni. Þetta kemur fram í yfirlýsingu sem lögmaður hennar sendi fréttamönnum í dag.

Þar segir að fjárkrafan byggist annars vegar á „launatekjutapi vegna breytinga á starfi hennar meðan hún var undir ákæru og hins vegar á launtekjutapi erlendis en henni var ókleift að vinna þar meðan hún var undir ákæru.“

Krafan um miska er reist á því að með samspili spítala- og lögreglurannsóknar hafi Ástu í raun verið talin trú um að hún væri völd að dauða manns. Segir í yfirlýsingunni að það hefði ekki gerst ef lögreglan hefði sjálf séð um fyrstu yfirheyrslu og lögmaður komið að málinu, enda hafi við réttarhöldin komið í „ljós að atvik gátu ekki hafa gerst með þeim hætti sem talið var.“

Þá er einnig byggt á að lagaumgjörð um rannsókn málsins hafi verið í andstöðu við stjórnarskrá og það hafi verið aðalástæðan fyrir því hvernig fór. Þá hafi öll málsmeðferðin og umfjöllun um málið ollið Ástu og fjölskyldu hennar mikilli vanlíðan og skaðað á líkama og sál. Að lokum hafi málið orðið til þess að orðstír Ástu beið hnekki, jafnvel þótt hún hafi verið sýknuð.

Tengdar fréttir

Hjúkrunarfræðingur sýknaður

Ríkið sýknað af kröfu Ástu Kristínar

• Bótamál Ástu Kristínar til Hæstaréttar
• Fær ekki bætur
• Deilt um bótakröfu hjúkrunarfræðings
• Fer fram á 4 milljónir í bætur

» Fleiri tengdar fréttir

• Blogga um frétt