Lögreglan á höfuðborgarsvæðinu leitar enn mannsins sem stakk konu með hníf í Greiningar- og ráðgjafarstöð ríkisins í Kópavogi í gærmorgun. „Hann huldi andlit sitt með einhvers konar grímu,“ segir Grímur Grímsson, yfirlögregluþjónn á rannsóknardeild lögreglunnar á höfuðborgarsvæðinu, í samtali við mbl.is.
Árásin átti sér stað í stigagangi hússins, á milli jarðhæðar og annarrar hæðar. Var konan, sem er starfsmaður við stöðina, á leiðinni upp en árásarmaðurinn á leið niður.
„Þau mætast þarna í stiganum,“ segir Grímur og bætir við að ekkert hafi farið á milli þeirra tveggja, maðurinn hafi þannig ekki tjáð sig neitt.
Lögregla telur ekki mikla hættu á annarri árás.
„Nei, við metum það ekki þannig,“ segir Grímur. Aðspurður segir hann þá að starfsfólki hafi ekki borist hótanir í aðdraganda árásarinnar.
„Við tengjum árásina ekkert endilega við starfsemi miðstöðvarinnar.“
Fréttir mbl.is:
Hnífamannsins enn leitað
Enginn í haldi vegna hnífstungunnar