Innlent | mbl | 18.10.2017 | 11:19 | Uppfært 13:14

Vill að stjórnvöld afturkalli lögbannið

Harlem Désir á ráðstefnu ÖSE í Vínarborg í morgun. Þar var rætt um frelsi á netinu. Ljósmynd/OSCE

„Ég skora á íslensk stjórnvöld að stilla sig um að beita frekari hömlum á umfjöllun fjölmiðla um þetta mál og afturkalla þær aðgerðir sem þegar hefur verið ráðist í.“ Þetta sagði Harlem Désir, fulltrúi Öryggis- og samvinnustofnunar Evrópu, ÖSE, á ráðstefnu í morgun.

Hann lýsti í dag yfir áhyggjum sínum af lögbanninu sem sýslumaðurinn á höfuðborgarsvæðinu lagði á Stundina og Reykjavík Media í fyrrakvöld, vegna umfjöllunar um viðskipti Bjarna Benediktssonar, formanns Sjálfstæðisflokksins, í aðdraganda efnahagshrunsins.

Hann sagði jafnframt að úrræði af þessum toga ætti að nota af varfærni og aðeins í mjög afmörkuðum tilfellum. Hann sagði að það markmið að standa vörð um persónuupplýsingar væri gott og gilt en að aðferðirnar til að ná því yrðu að vera í samræmi við viðurkenndar hugmyndir um tjáningarfrelsi. „Það að koma í veg fyrir allan fréttaflutning af þessu máli er of langt gengið og grefur undan frelsi fjölmiðla, sem og rétti almennings til upplýsinga.