Lögreglufulltrúi hjá lögreglunni á Suðurlandi vill hvorki staðfesta né neita ummælum lögmanns manns sem situr í gæsluvarðhaldi grunaður um að hafa banað bróður sínum í Biskupstungum um helgina.
Ólafur Björnsson, verjandi mannsins sem situr í gæsluvarðhaldi, sagði í samtali við RÚV í morgun að skjólstæðingur hans hefði vaknað um morguninn og ekki áttað sig á því hvað hefði gerst.
„Það liggur ekki fyrir hvað gerðist nákvæmlega þessa örlagaríku nótt og það verður bara að rannsaka það til hlítar,“ sagði Ólafur.
Elís Kjartansson, lögreglufulltrúi hjá lögreglunni á Suðurlandi, vildi sem minnst tjá sig um málið. Hann sagði þó að bráðabirgðaniðurstaða krufningar sýni að þetta sé áverki af mannavöldum. Oddur Árnason, yfirlögregluþjónn á Suðurlandi, sagði í gær að maðurinn sem situr í gæsluvarðhaldi væri grunaður um manndráp.
Elís segir rannsókn málsins í fullum gangi og að málið sé algjört forgangsmál.