Lyfjafræðingurinn Elín V. Magnúsdóttir ætlar að verða fyrsta konan til að ljúka við WOW Cyclothon hjólreiðahringinn þegar hjólreiðakeppnin fer fram í vikunni. Hún ræðst ekki á garðinn þar sem hann er lægstur, en þetta er fyrsta hjólreiðakeppnin sem hún tekur þátt í.
„Ég byrjaði að hjóla að staðaldri í vinnuna fyrir svona tíu árum og hef hjólað mikið síðan,“ segir Elín. „Ég hef gaman að því að hjóla langt. Ég hef hjólað tvisvar á æskuslóðirnar rétt hjá Kirkjubæjarklaustri.“
Hún segist hafa byrjað að hjóla fyrst heilsunnar vegna, en það hafi ekki skemmt fyrir að hjólreiðar séu þar að auki umhverfisvænn samgöngumáti.
Elín hefur verið í margs konar útivist í gegnum ævina, og mikið í fjallgöngum. „Ég var að skokka fyrir einhverjum árum síðan og á tímabili tók ég þátt í almenningshlaupum, og ég hljóp Laugarveginn tvisvar,“ segir hún.
Fjórir eru skráðir í einstaklingskeppnina í ár en keppendur í heildina eru tæplega þúsund talsins, þar af eru langflestir skráðir í flokki tíu manna liða. Einstaklingskeppnin hefst á þriðjudag og hafa keppendur þrjá og hálfan sólarhring til að ljúka hringnum.
„Þetta er búið að vera að gerjast í smá tíma, en ég fór að hugsa um þetta í alvöru síðasta haust,“ segir Elín spurð út í aðdraganda ákvörðunarinnar. „Systir mín var aðeins skeptísk á þetta í fyrstu og taldi þetta svolítið stórt verkefni. En hún féllst á að koma með í stuðningsliðið mitt,“ segir Elín en þriggja manna stuðningshópur fylgir henni hringinn.