„Hér er sérstakur viðbúnaður á barnaspítala og smitsjúkdómadeild þannig að einstaklingar sem eru smitaðir af mislingum geti lagst beint inn á viðeigandi deild,“ segir Jón Magnús Kristjánsson, yfirlæknir á bráðamóttöku Landspítalans.
Fjögur mislingasmit hafa komið upp hér á landi undanfarna daga og boðaði sóttvarnarlæknir til neyðarfundar vegna þess í dag.
„Þar var sett í gang viðbragð í samstarfi sóttvarnarlæknis, Landspítala, heilsugæslustöðvanna á höfuðborgarsvæðinu og Læknavaktarinnar,“ segir Jón Magnús.
Einstaklingar sem hafa áhyggjur af mislingasmiti eða vilja óska nánari upplýsinga eru hvattir til þess að hringja í upplýsingasímann 1700 þar sem hægt er að fá samband við fagfólk. „Þá er hægt að fá heimavitjun í stað þess að leita á læknavakt eða bráðamóttökur. Það er gert vegna þess hve smitandi mislingarnir eru.“
„Viðbragð Landspítalans felst í því að styðja við þetta almenna viðbragð með ráðum og dáð,“ segir Jón Magnús.