Birtustundum á vökutíma, milli 07 og 23, í Reykjavík myndi fækka um 131 á ári ef klukkunni yrði seinkað um eina stund. Þetta er meðal þess sem fram kemur í umsögn dr. Þórðar Arasonar jarðeðlisfræðings við tillögu þess efnis.
Skýrist það af því að stóran hluta ársins er sól risin löngu áður en fólk fer á fætur, og þá mánuði gagnaðist það fáum að fá hana klukkustund fyrr á loft. Fólk vaknar hvort eð er í birtu. Á sama tíma tapaðist engu að síður ein klukkustund af kvöldbirtu, þar sem sólin settist klukkustund fyrr síðdegis meðan fólk vakir enn.
Þannig væru sólarstundir færðar frá vökutíma og yfir á þann tíma, snemma á morgnana, sem flest fólk sefur. Breytingin myndi einnig skila sér í kaldara kvöldveðri, en ef hitatölur síðustu 20 ára eru skoðaðar sést að á milli klukkan 19 og 20 á kvöldin lækkar hiti að meðaltali um hálfa gráðu á sumrin, og eina gráðu á vorin og haustin.
Stuðningsmönnum klukkubreytinga er tíðrætt um mikilvægi þess að vakna í birtu. Vegna þess hve miklar árstíðarsveiflur eru á sólarupprás og sólsetri, eins og þekkt er, myndi færsla á klukkunni þó duga skammt til að tryggja að vaknað sé í birtu. Í Reykjavík færist sólarupprás og sólsetur að jafnaði um þrjár mínútur á dag í hvora átt. Væri klukkan færð aftur um klukkustund myndi þeim dögum sem vaknað er í birtu því aðeins fjölga um u.þ.b. 20 á haustin og 20 á vorin.
Klukkan á Íslandi er nú stillt miðað við heimstíma (Universal Coordinated Time, UTC). Í grein Þórðar er bent á að nokkuð hagræði felst í því fyrir Íslendinga enda sé heimstíminn jafnan notaður í alþjóðasamskiptum. Þannig er heimstíminn notaður í flugi, við veðurathuganir, jarðvísindamælingar, stjörnuathuganir og í Alþjóðlegu geimstöðinni.
Því hefur verið haldið fram að stilling klukkunnar á Íslandi skeri sig mjög úr þegar litið er á heimskortið. Upphaflega voru tímabeltin miðuð við að sól væri hæst á lofti á milli 11:30 og 12:30 (þ.e. klukkan 12 í miðju beltinu), en í Reykjavík er sól hæst á lofti um klukkan 13:30.
Eins og sjá má af kortinu að ofan víkja þó fjölmörg ríki heims frá beltatímanum, og jafnan í átt að flýttri klukku, líkt og á Íslandi. Þessu til viðbótar notast flest nágrannaríki Íslands við sumartíma meirihluta ársins (30 eða 31 viku á ári) og er klukkan þá einni stund fljótari en myndin segir til um.
Má ætla að sú tilhögun komi til af viðleitni manna til að hámarka fjölda birtustunda í vöku, en það er gert með því að hafa sólina hæst á lofti sem næst miðjum vökutíma fólks (sem jafnan er töluvert seinna en klukkan 12).
Evrópusambandið undirbýr nú að leggja af sumar- og vetrartíma, og þykir líklegt að klukkan verði þá varanlega stillt á sumartíma, rétt eins og ákveðið var hér á landi árið 1969 þegar sumar- og vetrartími voru aflagðir og ákveðið að miða við sumartímann, UTC, allan ársins hring.
Þá hefur sú hugmynd einnig komið til tals vestanhafs og lýsti Donald Trump Bandaríkjaforseti því yfir á Twitter í gær að hann væri hlynntur, eða setti sig í það minnsta ekki á móti, því að Bandaríkin geri slíkt hið sama.
Ljóst er því að hugmyndir um að seinka klukkunni hérlendis ganga að einhverju leyti gegn ríkjandi straumum beggja vegna Atlantsála.