Mennta- og menningarmálaráðuneytið hefur tryggt framhaldsskólum aðgang að 20 til 25 þúsund grímum sem Landspítalinn mun útvega í dag.
Með þessu á að tryggja að staðnám verði að mestu leyti óbreytt, að því er Lilja Alfreðsdóttir mennta- og menningarmálaráðherra greinir frá á facebooksíðu sinni.
Þar segist hún hafa átt í miklum samskiptum við heilbrigðisyfirvöld um helgina um næstu skref. Skólahald verði með óbreyttum hætti og áhersla lögð á staðnám en nú með notkun andlitsgríma.
Fram kemur í uppfærðum leiðbeiningum ráðuneytisins að skylt sé fyrir nemendur, kennara og annað starfsfólk framhalds- og háskóla að nota grímu í skólabyggingum og í öllu skólastarfi.
„Við funduðum með skólameisturum og rektorum landsins í dag og var gott hljóðið í öllum. Ég vil þakka þeim öllum fyrir þolinmæðina og baráttuviljann í þessari þriðju bylgju!“ skrifaði hún seint í gærkvöldi.
Tölur helgarinnar hafa vissulega áhrif á líf okkar. En eins og svo oft áður þá látum við ekki deigan síga. Um helgina...
Posted by Lilja Alfreðsdóttir / Mennta- og menningarmálaráðherra. on Sunnudagur, 20. september 2020