30 til 35 millimetra úrkoma á Seyðisfirði
Ragnhildur Þrastardóttir
Setja bókamerki
Talsvert mikil úrkoma var á Seyðisfirði í nótt eins og sérfræðingar Veðurstofu Íslands gerðu ráð fyrir. Engar fréttir hafa borist af nýjum skriðuföllum en það verður kannað betur bráðlega. Úrkoman náði líklega 30 til 35 millimetrum.
Þetta segir Tómas Jóhannesson, sérfræðingur á ofanflóðavakt hjá Veðurstofu Íslands.
Um 100 íbúar í 46 húsum á Seyðisfirði rýmdu hús sín í gærkvöldi vegna skriðuhættu á svæðinu. Fyrr um daginn hafði ríkislögreglustjóri, í samstarfi við Veðurstofuna og lögreglustjórann á Austurlandi, lýst yfir hættustigi á svæðinu.
„Við eigum von á því að rigningin hætti núna upp úr miðjum morgninum, það dragi úr henni fljótlega og þá verður rýmingin endurskoðuð núna upp úr hádeginu,“ segir Tómas.
Skoða aðstæður bráðlega
Rýmingin var framkvæmd í varúðarskyni þar sem óvissa er um stöðugleika hlíðanna í Botnabrún eftir skriðuföllin í desember 2020 og hvernig jarðlög bregðast við ákafri úrkomu.
„Það hefur verið talsvert mikil úrkoma í nótt, eins og við gerðum ráð fyrir. Hún náði kannski 30 til 35 millimetrum síðla nætur. Við erum að fara til þess að skoða en höfum ekki fengið neinar fréttir af skriðuföllum.“
Magn úrkomu er gefið upp í millimetrum og jafngildir 30 til 35 millimetra úrkoma því að 30 til 35 millimetra lag af vatni hafi lagst yfir alla jörðina í námunda við úrkomumælinn. Þetta magn jafngildir 30 til 35 lítrum á fermetra, miðað við svar Trausta Jónssonar veðurfræðings á Vísindavefnum.
Ríkislögreglustjóri hefur lýst yfir hættustigi á Seyðisfirði vegna hættu á skriðuföllum. Þetta er gert í samráði við lögreglustjórann á Austurlandi og Veðurstofu Íslands. Ákveðið hefur verið að rýma öll hús við Botnahlíð, tólf hús við Austurveg, þrjú hús við Fossgötu, sjö hús við Hafnargötu, eitt hús við Múlaveg og eitt hús við Baugsveg fyrir klukkan sjö í kvöld.
Vonast til að tjaldbúðir við HÍ standi áfram
„Höfum ekki náð að skríða upp úr þeirri gryfju“
Telur forsendur fyrir vaxtalækkun
Nemendur í HÍ reistu tjaldbúðir án leyfis
Banna mengandi búnað sem leyfður er á Íslandi
Sex hafa greinst með listeríu
Strand skemmtiferðaskips kallar á erlenda aðstoð