Skógræktarfélag Reykjavíkur telur að gróðureldurinn sem kviknaði í Heiðmörk í gær hafi farið yfir 56 hektara svæði. Félagið hvetur fólk til þess að fara varlega með eld í grennd við gróður.
Á hluta svæðisins sem brann var aðeins lággróður svo sem gras og lúpína.
„Annars staðar voru stöku tré eða þéttara skóglendi. Við upptökin fór eldurinn hratt yfir í grasi, án þess að valda miklum skaða á trjágróðri. Þegar á leið færðist eldurinn hins vegar í aukana og stórskemmdi eða eyddi trjám og runnum. Skemmdir á trjágróðri á svæðinu þar sem eldurinn herjaði eru því mismiklar,“ segir í tilkynningu frá Skógræktarfélagi Reykjavíkur.
Eins og mbl.is greindi frá í morgun er möguleiki á að eldur kvikni að nýju á svæðinu. Starfsmenn Skógræktarfélags Reykjavíkur munu kanna ástand svæðisins í dag, að því er segir í tilkynningunni. „Mikilvægt er að fylgjast með því að ekki leynist eldglæður í mosa eða öðrum lággróðri.“
Svæðið sem brann í gær er í Hjalladal en algengasta trjátegundin er stafafura.
„Þekkt er að stafafura sáir sér hratt eftir elda sem fræ hennar þola vel. Aðrar tegundir eru meðal annars ösp og greni. Gróðursetningar á svæðinu hófust árið 1986 og voru þarna nokkrir gamlir og vel grónir landnemareitir. Þá var jólaskógur Skógræktarfélags Reykjavíkur á þessu svæði í nokkur ár, fyrir örfáum árum síðan,“ segir í fyrrnefndri tilkynningu.
„Skógræktarfélag Reykjavíkur hvetur gesti Heiðmerkur til að hugsa vel um friðlandið og fara varlega með eld, sérstaklega þegar gróður er jafn þurr og nú.“