Alls hafa um 18,7% kosningabærra manna greitt atkvæði utan kjörfundar í alþingiskosningunum sem formlega hefjast á morgun.
Samtals greiddu um 39.300 manns atkvæði utan kjörfundar í alþingiskosningunum árið 2017 en nú hafa um 47.600 manns skilað inn atkvæði utan kjörfundar.
Mikill fjöldi streymdi inn á kjörstað í Smáralind í dag og myndaðist löng biðröð, en Sigríður Kristinsdóttir sýslumaður á höfuðborgarsvæðinu segir í samtali við mbl.is að aðsóknin hafi verið mikil í gær og í dag.
Um 5.800 manns greiddu atkvæði utan kjörfundar í gær og er útlit fyrir að svipaður fjöldi greiði atkvæði í dag.
Kjörstaðir utan kjörfundar loka klukkan 10 í kvöld en aftur verður opið frá klukkan 10 til 17 á morgun, fyrir þá sem hafa lögheimili utan höfuðborgarsvæðisins.