Innlent | mbl | 25.2.2023 | 10:15 | Uppfært 11:13

Efling segir að World Class taki ekki þátt í verkbanni

Verkbannið hefst að öllu óbreyttu hefjast á hádegi fimmtudaginn 2. mars. mbl.is/Eggert Jóhannesson

World Class, Te og Kaffi og KFC eru, að sögn Eflingar, á meðal þeirra fyrirtækja sem hafa lýst því yfir við starfsfólk sitt að þau ætli ekki að taka þátt í verkbanni Samtaka atvinnulífsins (SA) sem á að hefjast á fimmtudag.

Frétt af mbl.is

Ræddu um frestun eða aflýsingu aðgerða

Þetta kemur fram á vef Eflingar og er samkvæmt könnun sem stéttarfélagið setti fram á vefsíðu sinni í gær.

Þetta hefur þó ekki verið staðfest af fyrirsvarsmönnum fyrirtækjanna og könnuninni var þannig háttað að hver sem er gat skilað þar inn svörum.

Björn Leifsson, framkvæmdastjóri World Class, hefur síðan hafnað þessu alfarið í samtali við mbl.is.

Frétt af mbl.is

„Mesta þvæla sem ég hef heyrt“

Í tilkynningu Eflingar segir að á þriðja hundrað félaga í Eflingu hefðu svarað könnunni þar sem spurt var hvaða upplýsingar fyrirtæki hafi veitt starfsfólki um hvort verkbanni SA verði hlýtt eða ekki.

Samkvæmt könnunni hafa 13 fyrirtæki sagt starfsfólki sínu að þau ætli ekki að taka þátt í verkbanninu, en auk fyrrnefndra fyrirtækja eru það Nings, Gleðiheimar, Garðlist, Serrano, IceTransport, Iðnmark, Fagkaup, Vaka hf., Gólflagnir ehf. og Loftorka Reykjavík.

Frétt af mbl.is

Þátttaka í verkbanni ekki valkvæð

Í yfirlýsingu sem SA sendi frá sér á fimmtudag kom fram að einstakir atvinnurekendur og starfsfólk sem verkbann beinist gegn hafa ekki val, frekar en í tilviki verkfalla um það hvort hlíta skuli lögmætu verkbanni. Slíkt felur í sér brot á 18. gr. vinnulöggjafarinnar.

Össur, Eimskip og N1 taki þátt

Samkvæmt Eflingu eru Össur, Eimskip, N1 og Ölgerðin meðal þeirra fyrirtækja sem hafa lýst yfir að þau ætli að taka þátt í verkbanninu.

Coca Cola á Íslandi, Samskip, Securitas og Dominos eru á meðal þeirra fyrirtækja sem hafa ekki veitt starfsfólki sínu upplýsingar samkvæmt könnunni.

„Nöfn fyrirtækjanna eru birt með fyrirvara um að hér er um að ræða upplýsingar sem ekki koma frá fyrirtækjunum sjálfum heldur úr nafnlausum svörum félagsfólks,“ segir í tilkynningu Eflingar.