Lindarhvoll og ríkið sýknað
Setja bókamerki
Íslenska ríkið og Lindarhvoll ehf. voru í dag sýknuð af kröfum félagsins Frigusar II ehf. um bætur vegna sölu á eignarhlut ríkisins í Klakka, en það var Lindarhvoll, félag í eigu ríkisins, sem sá um söluna á sínum tíma.
Sigurður Valtýsson, einn eiganda Frigusar, segist telja líklegt að málinu verði áfrýjað en að ákvörðun verði tekin þegar búið verður að fara yfir dóminn.
Frigus II ehf. höfðaði mál á hendur Lindarhvoli og íslenska ríkinu vegna sölu Lindarhvols á hlut ríkisins í Klakka. Fór lögmaður Frigusar fram á rúmlega 650 milljóna bætur í málinu ásamt vöxtum frá því í apríl 2019.
Lindarhvol var félag sem stofnað var af fjármálaráðherra til að hafa umsjón með þeim eignum sem komu til ríkisins í gegnum Seðlabanka Íslands í tengslum við stöðugleikframlög slitabúa bankanna. Hafði félagið svo umsjón með sölu eignanna. Ein þeirra eigna var hlutur ríkisins í Klakka, en hann var seldur árið 2016. Gert var samkomulag við Steinar Þór Guðgeirsson hjá Íslögum um framkvæmdastjórn með félaginu, en hann er jafnframt verjandi Lindarhvols í málinu.
Frigus II er í eigu Ágústs og Lýðs Guðmundssonar og Sigurðar Valtýssonar og var félagið einn þriggja aðila sem lögðu fram kauptilboð í eignina. Það gerði Frigus II ehf. í gegnum Kviku banka sem gert hafði samning um að miðla eigninni til félagsins ef af kaupunum yrði. Forsvarsmenn Frigus II ehf. töldu sig hafa lagt fram hæsta tilboðið og þannig hefði félagið verið hlunnfarið í söluferlinu þegar tilboði annars félags, BLM fjárfestinga ehf., var tekið. Höfðaði Frigus II ehf. skaðabótamál í kjölfarið.
Inn í málið fléttast úttekt ríkisendurskoðanda á málefnum Lindarhvols og greinargerð sem forseti Alþingis hefur setið á undanfarið og ekki viljað birta. Þannig var Sigurður Þórðarson settur ríkisendurskoðandi í málefnum Lindarhvols vegna vanhæfis þáverandi ríkisendurskoðanda. Átti hann að vinna skýrslu að beiðni þingsins um starfsemi Lindarhvols.
Nokkru síðar var hins vegar Skúli Eggert Þórðarson skipaður ríkisendurskoðandi og tók hann við málinu þar sem hann var ekki vanhæfur. Skilaði hann skýrslu árið 2020 þar sem engar athugasemdir voru gerðar við störf stjórnar félagsins eða rekstur þess.
Það virðist nokkuð í andstöðu við þá vinnu sem Sigurður var kominn af stað með, en hann skilaði greinargerð til fjármálaráðherra sem enn hefur ekki verið birt af forseta Alþingis. Í skýrslutöku í dómsmáli Frigusar gegn Lindarhvoli fékkst hins vegar heimild til að leiða Sigurð fyrir dóminn og var hann þar spurður út í skoðun sína. Sagði hann m.a. hafa gert athugasemdir við aðkomu Steinars Þórs að rekstrinum og að líklega hefði ekki verið nægjanlegur aðskilnaður starfa heldur hafi hann verið allt í öllu.
Jafnframt sagði Sigurður að mat hans og endurskoðandans Stefáns Svavarssonar á verðmæti eignarhluta ríkisins í Klakka hefði verið um 950 milljónir, en endanlegt söluverð hafi hins vegar aðeins verið 423 milljónir. Taldi Sigurður að ríkið hefði því orðið af um 530 milljónum vegna sölunnar.
Á Alþingi hafa miklar umræður farið fram um greinargerð Sigurðar og hvort Birgir Ármannsson, forseti Alþingis, eigi að afhenda greinargerðina. Hefur Birgir sagt að greinargerðin sé vinnuskjal og því megi ekki afhenda hana, en stjórnarandstaðan hefur gagnrýnt leyndarhyggjuna í kringum greinargerðina. Þá hefur núverandi ríkisendurskoðandi blandað sér í málið og sagði í tilkynningu á dögunum að greinargerðin væri vinnuskjal sem mætti ekki birta og vísað var í lög um ríkisendurskoðanda.
Samkvæmt ársreikningi ársins 2016 var bókfært virði stöðugleikaframlagseigna í umsjón Lindarhvols í upphafi rúmlega 162 milljarðar. Hluturinn í Klakka var því aðeins lítill hluti heildareigna sem félagið hafði yfirumsjón með að selja.
Gígbarmurinn hækkað frá því í gær
Strand skemmtiferðaskips kallar á erlenda aðstoð
Breytingar á skipulagi fréttadeildar RÚV
/frimg/1/29/32/1293273.jpg)
Ekki af baki dottinn og ætlar að opna B5 aftur
„Höfum ekki náð að skríða upp úr þeirri gryfju“
Telur forsendur fyrir vaxtalækkun
Væri að ljúga ef ég segðist ekki stressaður