Tommi á Búllunni, Kristrún Frosta og fleiri glæný

Tómas, Kristrún og Lenya.
Tómas, Kristrún og Lenya. Samsett mynd

Alls taka 23 nýir þingmenn sæti á Alþingi eftir þessar kosningar, þó nokkrir hafi reyndar reynslu af þingstörfum. Þar er elstur Tómas A. Tómasson, betur þekktur sem Tommi á Búllunni, sem tekur sæti fyrir Flokk fólksins og Lenya Rún Taha Karim sem tekur sæti fyrir Pírata. Tómas er 72 ára gamall en Lenya er 21 árs. 

Samtals 10 nýir hjá Framsókn og Sjálfstæðisflokki

Framsókn kynnir til leiks flesta nýliða eða sex slíka, þau Hafdísi Hrönn Hafsteinsdóttur og Jóhann Friðrik Friðriksson í Suðurkjördæmi, Ágúst Bjarna Garðarsson í Suðvesturkjördæmi, Ingibjörgu Ólöfu Ísaksen í Norðausturkjördæmi, Stefán Vagn Stefánsson í Norðvesturkjördæmi og Lilju Rannveigu Sigurgeirsdóttur en Stefán Vagn og Lilja hafa reyndar áður setið á þingi fyrir flokkinn sem varaþingmenn. 

Stefán Vagn Stefánsson.
Stefán Vagn Stefánsson. mbl.is/Sigurður Bogi Sævarsson

Nýliðar Sjálfstæðisflokksins eru Guðrún Hafsteinsdóttir í Suðurkjördæmi, Berglind Ósk Guðmundsdóttir í Norðausturkjördæmi, Hildur Sverrisdóttir í Reykjavíkurkjördæmi suður og Diljá Mist Einarsdóttir í Reykjavíkurkjördæmi norður. Hildur hefur reynslu af þingstörfum en hún var alþingismaður Reykjavíkurkjördæmis suður árið 2017 og hefur hún einnig setið sem varaþingmaður Sjálfstæðisflokksins.

Guðrún Hafsteinsdóttir er væntanleg á Alþingi. Hún starfaði áður sem …
Guðrún Hafsteinsdóttir er væntanleg á Alþingi. Hún starfaði áður sem formaður Samtaka iðnaðarins og markaðsstjóri Kjörís.

Jakob Frímann náði inn á þing

Fjórir nýliðar taka sæti á þingi fyrir Flokk fólksins. Þar ber að nefna Eyjólf Ármannsson í Norðvesturkjördæmi, Ásthildi Lóu Þórsdóttur í Suðurkjördæmi, Jakob Frímann Magnússon í Norðausturkjördæmi og fyrrnefndan Tómas í Reykjavíkurkjördæmi norður. 

Jakob Frímann Magnússon er nýr þingmaður Flokks fólksins.
Jakob Frímann Magnússon er nýr þingmaður Flokks fólksins.

Staðan breyttist hjá VG rétt í blálokin 

Nýliðarnir eru þrír hjá Vinstri grænum. Það eru þau Bjarni Jónsson í Norðvesturkjördæmi, Hólmfríður Árnadóttir í Suðurkjördæmi og Jódís Skúladóttir í Norðausturkjördæmi. Fyrir einungis tveimur klukkustundum leit út fyrir að Una Hildardóttir myndi taka sæti á þingi fyrir Vinstri græn, og koma ný inn, en þegar lokatölur voru kynntar um níuleytið varð ljóst að Jódís myndi taka jöfnunarsætið sem áður hafði verið kennt við Unu. 

Hólmfríður Árnadóttir er einn af nýliðum VG.
Hólmfríður Árnadóttir er einn af nýliðum VG.

Tvær konur fyrir Pírata og tveir karlar fyrir Viðreisn

Tvær nýjar þingkonur taka sæti fyrir Pírata, fyrrnefnd Lenya í Reykjavíkurkjördæmi suður og Arndísi Anna K. Gunnarsdóttir í sama kjördæmi. Þær eru báðar jöfnunarþingmenn. 

Arndís Anna K. Gunnarsdóttir er önnur af tveimur nýjum þingkonum …
Arndís Anna K. Gunnarsdóttir er önnur af tveimur nýjum þingkonum Pírata.

Tvö ný andlit munu birtast á þingi fyrir Viðreisn, það eru þeir Guðmundur Gunnarsson í Norðvesturkjördæmi og Sigmar Guðmundsson í Suðvesturkjördæmi. Þeir eru báðir jöfnunarþingmenn.

Sigmar Guðmundsson fjölmiðlamaður er nýr þingmaður Viðreisnar.
Sigmar Guðmundsson fjölmiðlamaður er nýr þingmaður Viðreisnar.

Kristrún og Þórunn misnýjar þingkonur

Kristrún Mjöll Frostadóttir kemur ný inn fyrir Samfylkinguna í Reykjavíkurkjördæmi suður og Þórunn Sveinbjarnardóttir fyrir sama flokk í Suðvesturkjördæmi. Þórunn hefur áður sinnt þingmennsku en hún alþingismaður frá árinu 1999 og til ársins 2011. Þá var hún umhverfisráðherra á árunum 2007 til 2009. Þórunn var jafnframt formaður þingflokks Samfylkingarinnar frá árinu 2010 til ársins 2011.

Þórunn Sveinbjarnardóttir var formaður BHM en tekur nú sæti á …
Þórunn Sveinbjarnardóttir var formaður BHM en tekur nú sæti á Alþingi. Hún er reyndar enginn nýgræðingur þó hún hafi ekki setið á þingi í um áratug.

Ekkert nýtt hjá Miðflokknum en þrír reynsluboltar

Miðflokkurinn er eini flokkurinn sem ekki kynnir ný andlit til leiks enda tapaði flokkurinn fjórum þingsætum. Þingmenn sem halda sínu sæti þar eru því með reynslu af þingstörfum í farteskinu.

Fréttin hefur verið uppfærð

mbl.is