Úrskurðarnefnd kosningamála hefur hafnað kröfum Miðflokksins í Garðabæ um ógildingu sveitarstjórnarkosninganna í bænum.
Þetta kemur fram á vef Stjórnarráðsins.
Miðflokkurinn í Garðabæ kærði kosningarnar í Garðabæ til kjörstjórnar vegna þess sem flokkurinn lýsti sem alvarlegum ágalla á kjörseðli.
Lýsti flokkurinn því í bréfi til kjörstjórnar að sá alvarlegi ágalli hafi verið á kjörseðli að þegar kjósandi opnaði seðilinn blöstu þrír fyrstu listarnir við kjósandanum en þá gat hann ef til vill ekki áttað sig á seinna brotinu á seðlinum. Listi Miðflokksins var í hægri enda og brotinn inn í seðilinn og síðan var seðillinn brotinn saman til helminga.
„Yfirkjörstjórn fellst ekki á með kæranda að umbrot seðilsins hafi valdið sérstökum vandkvæðum við framkvæmd kosninganna eða um hafi verið að ræða ágalla sem áhrif hafi haft á úrslit þeirra. Einföld skoðun kjósanda á kjörseðli hafi afdráttarlaust leitt í ljós að kjörseðillinn var samanbrotinn og að opna þyrfti seðilinn á tvo vegu um fyrir fram gefin brot á seðlinum við framkvæmd kosninganna,“ segir meðal annars í úrskurðinum.
Yfirkjörstjórn geti ekki með vísan til alls framangreinds fallist á fullyrðingar kæranda M lista um að ágallar hafi verið á framkvæmd kosninganna í Garðabæ. Þá vísar yfirkjörstjórn á bug þeim málsástæðum kæranda er varða áhrif meints annmarka á úrslit kosninganna.
Kröfum Miðflokksins í Garðabæ um ógildingu sveitarstjórnarkosninga í Garðabæ er því hafnað.