Stefnumótaforritið Tinder hefur tilkynnt að notendur þess í Bandaríkjunum fái brátt aðgang að neyðarhnappi í forritinu, sem mun gera þeim kleift að gera yfirvöldum viðvart telji þeir sig vera í hættulegum aðstæðum.
Um er að ræða nýjasta skref stefnumótaforritsins vinsæla til þess að auka öryggi notenda sinna. Með því að ýta á neyðarhnappinn eru notendur tengdir öryggisforritinu Noonlight sem kemur þeim í samband við neyðarlínu.
Brittany LeComte, einn stofnenda Noonlight, segir hnappinn munu þjóna hlutverki eins konar lífvarðar í aðstæðum þar sem notendur væru einir eða að fara að hitta einhvern í fyrsta sinn.
Aðrar öryggisráðstafanir sem Tinder er með í bígerð eru svo t.d. sannprófun myndefnis notenda, sem mun felast í því að gervigreind metur ljósmyndir sem notendur hlaða inn í forritið og ber saman við ljósmynd sem tekin er af notandanum í rauntíma. Þeir notendur sem standast prófið fá svo eins konar skjöld sem verður staðfesting annarra notenda fyrir því að þeir hafi staðist sannprófunina og myndirnar séu af þeim.