Grænmetisrétturinn sem unglingarnir elska

Einstaklega girnilegur grænmetisréttur.
Einstaklega girnilegur grænmetisréttur. mbl.is/Svava Gunnarsdóttir

Grænmetisréttir eiga oft ekki upp á pallborðið hjá yngri kynslóðinni en þessi réttur þótti svo góður að hann var kláraður upp til agna. 

Það er Svava Gunnars á Ljúfmeti & lekkerheit sem á heiðurinn að uppskriftinni sem hún mælir heilshugar með. 

Sætkartöflu-, kjúklingabauna- og spínatkarrý – uppskrift fyrir 6  (lítillega breytt uppskrift frá Jamie Oliver)

  • 2 msk. ólífuolía
  • 2 rauðlaukar, sneiddir
  • 3 msk. karrýpaste (athugið að þau eru missterk, ég var með frá Blue Dragon)
  • 1 rautt chili, fínhakkað (takið fræin úr ef þið viljið ekki hafa réttinn sterkan)
  • 3 cm bútur af engifer, rifinn
  • handfylli af kóriander, laufin týnd af og stöngullinn hakkaður
  • 3 sætar kartöflur, skornar í 2 cm bita
  • 1 dós kjúklingabaunir (400 g), skolaðar
  • 1 dós hakkaðir tómatar (400 g)
  • 1 kjúklingateningur (eða grænmetisteningur)
  • 2 tsk. fiskisósa
  • 1 dós létt kókosmjólk (400 g)
  • 400 g spínat (ég var með 200 g), skolað

Aðferð: 

Hitið ólífuolíu í stórum potti eða pönnu yfir miðlungsháum hita. Bætið rauðlauk og karrý saman við og steikið í 10 mínútur, þar til laukurinn er orðin mjúkur. Bætið chilí, engifer, kórianderstönglum, sætum kartöflum og kjúklingabaunum í pottinn og steikið í 5 mínútur. Bætið þá tómötum, kjúklingateningi og 2 dl af vatni út í og látið suðuna koma upp. Lækkið hitann og látið sjóða við vægan hita í 10-15 mínútur undir loki. Takið lokið af og sjóðið áfram í 15-20 mínútur, þar til kartöflurnar eru soðnar og sósan hefur þykknað. Hærið kókosmjólkinni og fiskisósunni út í og sjóðið áfram í nokkrar mínútur. Hrærið spínatinu út í og sjóðið í 2-3 mínútur. Stráið kórianderlaufunum yfir og berið fram með hrísgrjónum.

Ef þið ætlið að frysta réttinn þá er best að láta hann kólna í pönnunni áður en hann er settur í box og frystur. Rétturinn geymist í 3 mánuði í frysti.

mbl.is/Svava Gunnars.
mbl.is