Fiskréttir eru oft nokkuð kúnstugir og oftar en ekki skortir okkur hugmyndaflugið til að detta eitthvað snjallt í hug. Þessi réttur kemur því eins og kallaður því hann er bæði auðveldur og svo fáránlega bragðgóður, svo góður reyndar að höfundur hans, María Gomez á Paz.is, segir að hún sé ábyggilega búin að gera hann fleiri hundruð sinnum.
Ef það það eru ekki meðmæli þá vitum við ekki hvað...
EXÓTÍSKUR FISKRÉTTUR SEM SLÆR Í GEGN
- 1 glas af grófum grjónum á móti 2 dl af vatni (ATH þurfa 30-45 mínútna suðu)
- Salt, sítrónusafi og þurrkuð steinselja til að krydda grjónin
- 800-1000 gr. ýsa eða þorskhnakkar (mér finnst ýsa betri)
- 1 lítil dós ananas
- 1/2 gul eða appelsínugul paprika
- 15 gr. kókósflögur eða kókósmjöl
- 1 stór dós kotasæla
- 1 dós sýrður rjómi með graslauk (þessi í grænu dollunum)
- Smá búnt af ferskum graslauk
- 2 msk. hunang
- 3 msk. sætt sinnep
- Rifinn ostur
- Oggupons paprikuduft
- salt og pipar
Aðferð
- Byrjið á að sjóða grjónin og saltið, setjið sítrónusafa og þurrkaða steinselju út á eftir smekk
- Kíkið svo á myndina hér fyrir ofan til að skoða með leiðbeiningunum.
- Þegar grjónin eru soðin setjið þau þá í botninn á eldföstu móti.
- Raðið svo ýsubitunum yfir og saltið og piprið.
- Skerið svo ananas og papriku í litla bita og dreifið yfir ýsuna ásamt kókósflögunum.
- Smyrjið svo næst kotasælunni yfir allt saman.
- Næst er svo að gera sinnepssósuna með sýrða rjómanum, hunanginu og sæta sinnepinu.
- Klippið svo smá ferskan graslauk út í ef þið viljið og hrærið sósunni vel saman.
- Hellið svo sinnepssósunni yfir kotasæluna og dreifið rifna ostinum yfir allt heila klabbið. Getið sett ferskan mozarella með líka sem er mjög gott.
- Gott er svo að setja oggupons af paprikudufti yfir ostinn.
- Hitið svo réttinn í ofni við 200 C blástur í 35 mínútur.
- Gott er að láta réttinn standa og blása aðeins úr sér í 10 mínútur áður en hans er neytt.