Þetta er skrítin fyrirsögn enda á þessi réttur eftir að koma ykkur verulega á óvart. Það er engin önnur en María Gomez á Paz.is sem á þessa uppskrift en hér blandar hún saman bbq sósu og jarðarberjum. Áhugaverð blanda sem er vel þess virði að prófa.
Kjúklingabringur með jarðarberjum og BBQ-sósu
- 4 bringur
- 1/2 lítill rauðlaukur smátt skorinn
- 2 msk. ólífuolía
- 1 bolli Hunts BBQ-sósa
- 2 msk. púðursykur
- 2 msk. balsamikedik
- 2 msk. hunang
- 8-10 stk. fersk jarðarber
- 1 dl rjómi
- salt og pipar
Aðferð
- Byrjið á að hita ofninn á 190°C, blástur.
- Skerið svo bringurnar þvert fyrir miðju þannig að úr verði tvær þunnar bringur úr einni
- Hitið olíu á pönnu og steikjið bringurnar þar til er komin smá gylling á þær, þurfa ekki að stikna í gegn, saltið þær og piprið.
- Takið bringurnar af pönnuni og setjið í eldfast mót.
- Steikjið svo smátt skorinn laukinn upp úr sömu olíu og kjúklinginn og saltið létt yfir
- Hellið svo BBQ-sósunni, balsamikedikinu, púðursykrinum og hunanginu út á og lækkið undir.
- Leyfið sósunni að þykkna og bætið þá við 1 dl rjóma.
- Sjóðið í nokkrar mínútur og hellið svo yfir kjúklinginn í eldfasta mótinu.
- Hafið í ofni í 25 mínútur.
- Skerið niður jarðarberin í þunnar skífur.
- Þegar rétturinn er til úr ofninum eru jarðarberin sett út á hann heitan og hrært saman við.
- Berið fram með kartöflumús eða frönskum eða cous cous og fersku salati.
Punktar
Ef þið óttist að jarðarberin verði eitthvað leðjuleg ofan í réttinum þá er það alveg óþarfi, ef þau eru sett út í þegar rétturinn kemur úr ofninum verða þau alveg fullkomin.