Það er engin önnur en Halla Bára Gestsdóttir sem á heiðurinn af þessari snilld. Hér erum við að tala um allt það sem við elskum mest; kjúkling, ost og Mexíkóstemningu.
Þetta er því klárlega uppskrift sem allir þurfa að prufa!
Nachos með kjúklingi, cheddar og rjómaosti
Kjúklingur:
- 3 stk. kjúklingabringur
- 2 msk. ólífuolía
- 2 msk. chipotle-paste, tilbúið í krukku (2-3 msk.)
- 31⁄2 tsk. hunang
- 1 stk. lime, kreistur safi og rifinn börkur
Ostasósa:
- 3 1⁄2 msk. smjör
- 3 msk. hveiti
- 500 ml mjólk
- 200 g rifinn cheddarostur frá Gott í matinn
Samsetning:
- 200 g rifinn gratínostur frá Gott í matinn
- 5 stk. vorlaukar, skornir fínt
- 2 stk. paprikur, græn og rauð
- 200 g svartar baunir, niðursoðnar
- 1 stk. mexíkóostur, rifinn
- hreinn rjómaostur frá Gott í matinn
- 6 stk. tortillur
- nachos
- jalapeno, magn eftir smekk
- ferskt kóríander
Kjúklingur
- Skerið kjúklinginn í strimla.
- Hrærið allt hráefnið saman og blandið vel.
- Nuddið kjúklinginn vel upp úr marineringunni. Ekki verra að leyfa honum að liggja aðeins í leginum.
- Steikið á pönnu þar til kjúklingurinn er eldaður í gegn.
Ostasósa
- Bræðið smjörið á vægum hita í potti.
- Hrærið hveitið saman við með písk þar til úr verður þykk bolla.
- Hellið þá mjólkinni í nokkrum skömmtum út í hveitibolluna og hrærið vel í hvert sinn þar til úr verður kekkjalaus jafningur. Hann er mjög þykkur í fyrstu en þynnist svo í hvert sinn.
- Þegar jafningurinn er orðinn hæfilega þykkur og kekkjalaus er rifnum osti stráð í nokkrum hlutum saman við hann og hrært vel þar til osturinn er bráðinn.
Samsetning
- Takið fram rúmgott fat sem má fara í ofn eða ofnskúffu. Hitið ofn í 200 gráður. Athugið að allt hráefnið í samsetninguna þarf að skiptast niður milli laga. Kjúklingurinn fer í tvö lög.
- Smyrjið ostasósu í botninn á fatinu. Leggið tortillur í botninn, gott að skera þær til svo þær passi vel í formið. Stráið rifnum osti yfir tortillurnar, þá kjúklingi, vorlauk, papriku, baunum, mexíkóosti og loks klípum af rjómaosti hér og þar.
- Endurtakið þetta ferli með því að leggja yfir annað lag af tortillum með ostasósu og öllu sem fylgir.
- Yfir það lag fara ekki tortillur heldur nachos-flögur og er rifnum ostum, vorlauk, papriku, baunum og svo jalapeno stráð yfir og inn á milli. Ostasósu er dreypt yfir. Gott að setja nachos aftur yfir og róta smá til í þessu efsta lagi. Hér má líka setja nokkra dropa af sósunni.
- Stingið í heitan ofn og hitið þar til ostarnir hafa bráðnað og tortillurnar hitnað vel.
- Stráið fersku kóríander yfir áður en rétturinn er borinn fram.