Drykkurinn sem þú verður að prófa!

Ljósmynd/Kristinn Magnússon

Þessi kokteill er algjörlega magnaður og þið verðið að prófa hann. Fyrir þá sem vilja drykkinn óáfengan mælum við með að nota áfengislaust romm en uppskriftirnar að sírópinu og líkjörnum eru allar í bókinni Heimabarinn sem kom út nú á dögunum.

Passion & Allspice Daiquiri

Þessa uppskrift gerðum við sérstaklega fyrir þessa bók en Ivan hefur þó verið að vinna með svipaðan drykk lengi. Yfirleitt þegar óákveðinn gestur á kokteilbörum sem hann hefur verið að vinna hjá vill fá kokteil að hætti barþjónsins er þetta drykkurinn sem hann hefur teygt sig í, enda einfaldur og þægilegur, bæði að gerð og drykkju.
  • 50 ml ljóst romm
  • 15 ml allspice-líkjör
  • 15 ml ástaraldinsíróp
  • 15 ml sykursíróp
  • 25 ml límónusafi

Skraut: ástaraldin

Við setjum öll hráefnin nema skrautið í hristara, fyllum hann alveg upp í topp með klaka og hristum hressilega í 10-15 sekúndur eða þar til hristarinn er orðinn vel kaldur. Þá er drykkurinn streinaður í gegnum sigti í kælt coupe-glas og skreyttur með fljótandi ástaraldini.

Eiginleikar

Ástaraldin og bökunarkrydd, eins og allspice (allrahanda), er bragðsamsetning sem svíkur engan. Við notum ljóst romm í þennan og helst þá romm sem er ríkt að vanillu. Vanillan úr romminu, ástaraldinið úr sírópinu, kryddið úr líkjörnum og límónan úr safanum fara fullkomlega saman í þessum ljúffenga drykk.

Ljósmynd/Kristinn Magnússon
Heimabarinn er fáanlegur í flestum verslunum.
Heimabarinn er fáanlegur í flestum verslunum.
mbl.is