Tímaritið Monitor | mbl | 8.8.2014 | 22:11

Heiðra Jón Gnarr í gleðigöngunni

Hópurinn sem mun heiðra Jón Gnarr vann að undirbúningi í dag.

„Undirbúningurinn gengur bara mjög vel. Við erum að vinna í því núna að mála borða og svona, gera þetta fallegt,“ segir Sigurður Ýmir Sigurjónsson, en hann ásamt fleirum tekur þátt í atriði Q, félags hinsegin stúdenta og ungliða Samtakana '78, í Gleðigöngunni á morgun. Að sögn Sigurðar eru 25 til 30 manns sem taka þátt í atriðinu.

Segir hann jafnframt að það sé í mörg horn að líta þegar það kemur að því að skipuleggja atriði í göngunni. „Þetta er búið að vera svolítið erilsamt undanfarna daga en þetta er allt að ganga upp.“

Þema atriðisins er „Fögnum fjölbreytileikanum“ og er lögð áhersla á að fagna öllum, ekki bara samkynhneigðum. „Við ætlum að flagga fánum samfélagsins, ekki aðeins regnbogafánanum. Þetta er jú ekki bara Gay Pride heldur Reykjavík Pride.“

Georg Bjarnfreðarson mætir í gönguna

„Þetta snýst um að kveðja Jón sem borgarstjóra með pompi og prakt,“ segir Vala Jónsdóttir, en hún tekur þátt í atriði í göngunni sem er tileinkað Jóni Gnarr.

„Hann hefur verið sýnilegur og ötull talsmaður fyrir réttindi hinsegin fólks og okkur fannst við hæfi að heiðra hann aðeins,“ segir Vala en um 10 manns taka þátt í atriðinu.

Sami hópur heiðraði fyrrum forsætisráðherra, Jóhönnu Sigurðardóttur, í Gleðigöngunni árið 2009.

Aðspurð um hvað hópurinn hyggst gera í göngunni á morgun segir Vala það vera fjölbreytt en tengjast Jóni Gnarr á einn eða annan hátt. „Við ætlum að vera í gervi Jóns, bæði sem hann sjálfur eða í gervi sem hann hefur sjálfur verið í. Það verður Georg Bjarnfreðarson, meðlimur Pussy Riot og fleiri.“

Hópurinn býst við góðri stemmningu á morgun og að allur undirbúningur klárist í kvöld. „Já við munum klára allt í kvöld. Svo hittumst við bara í morgunmat á morgun fyrir gönguna.“