Smartland Mörtu Maríu | Frami | mbl | 10.1.2018 | 6:00 | Uppfært 2.2.2018 15:14

5 Lífsreglur Mahatma Gandhi

Friðarleiðtoginn Mahatma Gandhi vildi sameina heiminn en ekki sundra honum. Hann var á móti stríði og sagði að fleiri hlutir sameini mannkynið en sundri því. Við skoðuðum lífskoðanir hans og settum niður fimm lífsreglur í hans anda.

1. Ást er sterkasta aflið

Gandhi var á móti stríði og taldi ást sterkasta aflið í heiminum. Hann var boðberi friðar í heiminum og mælti fyrir því að fólk talaði saman um ágreiningsefni sín. Að með samtali væri hægt að brúa öll ólík sjónarmið, einungis ef fólk notaði kærleika og skilning til að setja sig í spor óvina sinna.

2. Sama undir hvaða nafni, stríð á aldrei rétt á sér

Gandhi var alfarið á móti stríði og sagði það einungis skaða heiminn. Hann tók dæmi um einræðisherra á borð við Hitler, Mussolini, og Stalín, sem hefðu með verkum sínum skaðað heiminn allan og skilið eftir fólk í fátækt, án fjölskyldu eða hýbýla.

3. Það eru ótal málstaðir sem ég væri tilbúinn að deyja fyrir, en enginn málstaður sem ég væri tilbúinn að drepa fyrir.

Gandhi taldi okkur öll þrá friðsælt líf með tilgangi. Hann taldi það heigulshátt að berjast um völd, að tefla fram fólki fyrir málstað. En hugrekki að stilla til friðar, með því að fórna sér fyrir málstaðinn sem maður trúir á.

Gandhi fórnaði sínum eigin ferli fyrir málstað friðar í heiminum. Hann naut virðingar um heiminn allan, án þess að hafa völd eða ráða yfir einhverjum öflum. Þannig lifði hann hugsjónir sínar um hugrekki.

4. Auga fyrir auga, mun einungis gera heiminn blindan.

Gandhi taldi stríð og ófrið verða til vegna stífni í leiðtogum heimsins. Hann sagði allan heiminn eiga það sameiginlegt að vera mennskur, sama hverra trúar við erum eða hvaða hugsjónir við höfum. Öll viljum við það sama að lifa í frið og sátt með fjölskyldum okkar.

5. Við þurfum að vera sú breyting sem við viljum sjá í heiminum.

Gandhi sagði leiðtoga sem lofuðu upp í ermarnar á sér, einhverju sem þeir væru ekki tilbúnir að framkvæmda eftir kosningar, ekki leiðtogar sem hefðu völd sem myndi endast. Hann taldi að ef þú lofar einhverju verður þú að vera hluti af breytingunni og lifa þetta loforð á hverjum degi í lífinu. Ef þú vilt koma á friði í heiminum, getur þú ekki verið í stríði við allt og alla í kringum þig.