Tónlistarkonan Hildur Kristín Stefánsdóttir er dugleg að lyfta lóðum. Eins og svo margir er hún með það markmið þessa dagana að koma meiri reglu á hreyfinguna sína.
Hvað gerir þú til að halda þér í formi?
Ég stunda aðallega lyftingar. Að lyfta lóðum hefur verið í uppáhaldi lengi og ég verð eiginlega að fá einhverja þannig útrás. Þótt að jóga sé gott inn á milli þá finnst mér róleg líkamsrækt ekki gefa mér sama „kick“ og góð lyftingaræfing. Svo fer ég líka í sund nokkrum sinnum í viku, syndi ekki en sit í pottunum og gufunni. Það er ótrúlega góð og mikilvæg slökun.
Færð þú spark í rassinn á haustin og drífur þig í leikfimi?
Ekki sérstaklega á haustin. Ég var til dæmis miklu duglegri í ræktinni í sumar en í vetur. Ég tek oft tarnir þar sem ég er mjög dugleg í ræktinni í einhvern tíma og svo kemur kannski vinnutörn eða útlandaferð og þá dett ég út í smá tíma. Mitt markmið þessa dagana er að koma meiri reglu á þetta yfir allt árið.
Hvað færðu út úr hreyfingu?
Aðallega andlega vellíðan. Ég finn rosalega mikinn mun á jákvæðni og orku þegar ég er dugleg að mæta í ræktina. Þá kem ég oft meiru í verk líka.
Hugsar þú vel um mataræðið?
Já en ég er hætt í öfgum. Ég hef prófað alls konar kúra og mataræði en ég fæ alltaf leið á því að hugsa svona mikið um mat. Ég var á paleo-matarræði mikinn part á síðasta ári en svo fannst mér leiðinlegt að láta matarræði stjórna lífinu. Ég held að langbesta jafnvægið sé fólgið í að finna út hvað lætur manni líða vel án svakalegrar fyrirhafnar. Matarræði sem fellur vel að daglega lífinu. Svo á maður líka að hafa gaman af því að borða og leyfa sér mat sem gleður mann reglulega!
Hvað borðar þú til að láta þér líða betur?
Vel samsettan mat. Finnst frábært að fara á Bergsson eða Gló eða svona veitingastaði þar sem maður fær kúfaðan disk af allskonar hollum mat sem lætur manni líða vel.
Ertu með einhverja ósiði sem þú þarft að venja þig af?
Ég á það til að borða mjög óreglulega ef ég er stressuð og mikið er að gera. Það er um það bil versta hugmyndin því á þannig dögum þarf maður akkúrat mikið á næringu og orku að halda.
Hvað kemur þér í gott skap?
Góð tónlist og góður matur helst í góðum félagsskap. Klikkar seint!