Fólk í samböndum líklegra til að fitna

Það kannast margir við að fá sambandsfitu, og já hún er raunveruleg ef marka má vísindalega könnun sem staðfestir þessa mýtu. Þrátt fyrir að fólk í sambandi lifði heilsusamlegra lífi en þeir einhleypu í könnuninni átti það frekar til að fitna. 

Independent greinir frá rannsókn sem vísindafólk við Central Queensland University í Ástralíu gerði á 15 þúsund fullorðnum einstaklingum til þess að skoða hvaða áhrif hjúskaparstaðan hefði á lífsstíl fólks. 

Fólk í samböndum lifði heilsusamlegra lífi, borðaði meira af grænmeti og ávöxtum, forðaðist að reykja og drekka of mikið auk þess sem það forðaðist frekar skyndibita. Þrátt fyrir allt þetta var fólk í samböndum samt þyngra. 

Stephanie Schoeppe, aðalrannsakandi rannsóknarinnar, telur að ástæða fyrir muninum sé að það sé minni pressa á að líta vel út fyrir fólk í samböndum og börn spili líka inn í. Fólk í samböndum þarf ekki að hugsa um að líta út vel út til þess að heilla væntanlegan maka upp úr skónum og því líður vel með það að borða fituríkan og sætan mat. 

Niðurstöðurnar passa við rannsókn sem University of Glasgow gerði þar sem nýgift fólk bætti að meðaltali á sig tveimur kílóum á fyrsta ári hjónabandsins. 

Sambandsfita er þekkt fyrirbæri. mbl.is/Thinkstockphotos

• Blogga um frétt