Það að halda stóra veislu getur verið mjög streituvaldandi og þess vegna skiptir máli að reyna að auðvelda lífið eins og hægt er. Það þarf ekki að vera flókið að töfra fram skemmtilega veislu án þess að fjölskyldulífið fari á hliðina. Hér eru nokkur atriði sem ágætt er að hafa bak við eyrað.
Einhvern veginn virðist þetta hafa verið auðveldara í gamla daga. Þá var bara boðið upp á kalt borð með kjúklingaleggjum og fermingarfrönskum og svo var passað upp á að það væru sígarettur á hverju borði svo fólk gæti mökkað sig. Svo datt innismókurinn úr tísku, brauðréttir tóku völdin en svo þróaðist þetta út í það að enginn gat haldið veislu nema vera með „photo-booth“. Í gamla daga var fólk bara að reykja og tala saman í svona veislum og enginn spáði í því hvernig hann liti út á mynd (gömul myndaalbúm eru sönnun þess). Veislur með litaþema voru heldur ekki orðnar móðins og fermingarbörn þess tíma vissu ekki hvað húðrútína var.
Eftir að hafa haldið þó nokkrar veislur um ævina er Páfuglinn komin að þeirri niðurstöðu að það sé nauðsynlegt að velja meðskipuleggjendur vel. Kjöraðstæður eru að alla vega tveir aðilar skipuleggi, annar með virkara hægra heilahvel og hinn með virkara vinstra heilahvel, helst Ugla eða Fálki. Hægra heilahvelið fær ómótstæðilegar hugmyndir, kann að búa til stemningu og töfra, matbúa og skipuleggja innkaup puðra peningum út um gluggann meðan vinstra heilahvelið býr til kostnaðaráætlun, tímaáætlun og er með próf í mannfjöldastjórnun. Það er til dæmis mjög gott að hafa slíkan aðila með í ráðum þegar halda skal veislu sem inniheldur fleiri en 100 því viðkomandi veit hvað þarf mörg salerni fyrir hópinn.
Við hjónin ákváðum eftir síðustu fermingu á heimilinu að hann, vinstra heilahvelið, myndi framvegis búa til tímaplan. Það var ákveðið eftir að Páfuglinn var enn þá á nærbuxunum þegar fyrstu gestir komu í hús því það að útbúa heimagerða litla kjúklingaborgara tók aðeins lengri tíma en áætlað var. Páfuglinn gat ekki hugsað sér að þeir væru orðnir sveittir þegar þeir væru bornir á borð og fórnaði sturtu og fleiru svo það væri hægt. Þetta var að sjálfsögðu allt þess virði en pirraði vinstra heilhvelið á heimilinu dálítið því í hans huga var þetta að stefna í algert stjórnleysi.
Það hefur til dæmis gefist vel í veislum að panta snittur og pinnamat en bæta svo við sætndum sem útbúin eru á heimilinu. Mér finnst til dæmis ekkert jafnast á við gamaldags snittur með rækjum, roast beef, skinku og salati. Kransakökurnar og marsipanterturnar frá Kökuhúsinu eru líka dýrðin ein ef fólk vill vera visst um að kökurnar séu fullkomnar. Ef fólk vill útbúa eitthvað sjálft þá er sniðugt að baka sætindi í skúffum bakarofna, skera niður þegar það er orðið kalt og raða í box og geyma í frysti í nokkrar vikur. Þetta geta verið franskar súkkulaðikökur, Rice Krispies-kökur, hrákökur, Baby-Ruth-kökur eða kökupinnar. Prófaðu þig áfram og taktu gamla hefðbundna kökuuppskrift og settu í skúffu og sjáðu hvað gerist. Gott er að hafa nokkrar tegundir og raða svo saman á fallegan hátt á veisluborðið. Sörur sem bakaðar eru í skúffu eru líka mjög sniðugar því það er svo fljótlegt að baka þær í ofnskúffu, láta botninn kólna þegar hann er bakaður, búa til kremið og setja ofan á og loks setja súkkulaðið yfir. Þegar þetta er allt klárt er kakan skorin niður í litla bita og sett í box í frysti.
Baby Ruth-skúffukaka
4 dl sykur
4 dl púðursykur
1 tsk. lyftiduft
1 tsk. vanilludropar
5 dl salthnetur, smátt saxaðar
40 stk. ritz-kex, mulið smátt
Stillið ofninn á 180°C.
Stífþeytið eggjahvítur og sykur saman. Bætið því næst salthnetum, ritz-kexi, lyftidufti og vanilludropum varlega saman við með sleif. Setjið bökunarpappír á ofnskúffu og dreifið vel úr deginu svo það sé jafnþykkt. Bakið í um það bil 30 mínútur og kælið.
Á meðan kakan er í ofninum er kremið búið til.
Krem
150 g flórsykur
100 g smjör
200 g suðusúkkulaði
Þeytið eggjarauður og flórsykur vel saman, þar til það er ljóst og létt. Bræðið smjör og súkkulaði saman við vægan hita yfir vatnsbaði. Hellið súkkulaðiblöndunni varlega út í eggjahræruna og blandið varlega saman. Þegar botninn er orðinn kaldur er kremið sett yfir og fallegt er að skreyta með salthnetum og kannski einhverju litríku kökuskrauti. Kælið kökuna með kreminu áður en hún er skorin í bita og raðað í box og sett í frysti.
Páfuglar heimsins elska að halda veislur og ef þú ert einn slíkur eða býrð með einum gæti verið sniðugt að koma sér upp „veisluhillu“ í bílskúrnum eða uppi í efri skáp. Það er að segja ef þú sérð fram á að halda nokkrar veislur í framtíðinni. Hver vill að lífið verði eins og samfelldur vinnudagur? Það gerist ef fólk staldrar ekki við á tímamótum og heldur upp á þau (og tekur mynd). Í þessari veisluhillu gætu verið glerglös á fæti, diskar og skraut sem má nota aftur og aftur. Páfuglinn kaupir reglulega skrautpinna til að skreyta kökur með en vaskar þá upp eftir hverja veislu og geymir og notar ár eftir ár. Það getur líka verið gott að eiga nokkra vasa, krukkur eða flöskur sem hægt er að nota sem borðskraut með því að setja lifandi blóm í. Í gegnum tíðina hefur Páfuglinn oft keypt efni í IKEA og notað sem dúka á veisluborð. Oft þarf bara að falda kantana og strauja svo allt verði upp á 10. Eitt sinn keypti Páfuglinn litlar „kókflöskur“ í hlutafélagi við uppáhaldsfrænku sína sem er líka Páfugl. Þessar „kókflöskur“ rúma eins og eitt skot af skriðdrekaolíu eða ávaxtasafa fyrir þá sem eru á snúrunni. Það er ekki mælt með áfengisneyslu í fermingarveislum en það getur verið gott að eiga svona flöskur þegar fullorðnir hittast.
Þegar kemur að því að skreyta veisluborðið finnst Páfuglinum alltaf fallegt að hafa veitingar á nokkrum hæðum. Hægt er að kaupa pappadiska á hæðum í verslunum eins og Partýbúðinni eða Allt í köku. Slíkir diskar geta gert veisluborðið svolítið skemmtilegt en svo er líka hægt að kaupa sérstakt lím og líma fætur undir diska úr IKEA. Oft getur líka verið fallegt að setja speglaflísar á borð og raða veitingum á það því þá verður veisluborðið eins og hjá Kardashian-systrunum sem búa í Hollywood. Hver þráir það ekki?
Þegar fólk er búið að ákveða litaþema og borðbúnað getur verið stemning í því að kaupa sleikipinna, hlaup, kókósbollur, hraunbita, lakkrís, sykurpúða eða bara það sem fólki dettur í hug til þess að skreyta borðið með. Ef fólk er með ákveðið litaþema þá er um að gera að taka matarlitinn aðeins lengra með því að lita veitingarnar. Það er auðvelt að nota bleikt súkkulaði í staðinn fyrir brúnt. Hægt er að kaupa bleikt súkkulaði úti í búð eða kaupa hvítt súkkulaði og lita það með matarlit yfir vatnsbaði. Fólk þarf þó að hafa í huga að liturinn getur orðið aðeins daufari þegar súkkulaðið kólnar. Hin klassíska súkkulaðikaka með karamellu og súkkulaði verður til dæmis miklu skemmtilegri ef hún kemst í annan lit en brúnan. Það er þó betra að hægra heilahvelið framkvæmi þetta því vinstra heilahvelið væri enn þá að velta fyrir sér hvað færu nákvæmlega margir dropar af matarlit út í súkkulaðið og kakan hefði því ekki verið bökuð.
Ef þú ert að fara að ferma afkvæmi þitt þá skaltu hoppa út í næstu matvöruverslun, kaupa egg, matarlit og hvítt súkkulaði og bjóða fermingarbarninu í óvissuferð inn í eldhús og sjá hvaða ævintýri bíða ykkar!