Plöntur eiga ekki heima í svefnherberginu

Lifandi plöntur verða vinsælli með hverjum deginum. Plönturnar eru ekki bara flottar og lífga upp á heimilið heldur eru þær sagðar hafa góð áhrif á heilsuna, eru til dæmis sagðar fylla fólk orku. Ef farið er eftir feng shui eiga þó plöntur ekki heima í öllum rýmum. 

Mindybodygreen fékk ráð hjá nokkrum feng shui-sérfræðingum. „Þar sem plöntur eru mjög virkar og standa fyrir vexti eru þær ekki góðar fyrir eins hlutlaust og friðsælt og rólegt herbergi,“ sagði Dana Claudat, sérfræðingur í feng shui, um plöntur í svefnherbergjum. Að hennar mati er hægt að færa orku jarðarinnar inn í svefnherbergi með til dæmis rúmfötum úr lífrænni bómull eða bleikum saltkristöllum. 

Það er aldrei of mikið af plöntum. Ljósmynd/IKEA

Annar sérfræðingur í feng shui tekur undir orð Claudat og segir að plöntur geti verið rót svefnvandamála. Ekki eru þó allir feng shui-sérfræðingar sammála og vill enn annar meina að ef plöntur eru í herberginu og svefnvandamál séu ekki til staðar ættu plönturnar að vera í góðu lagi. 

Þrátt fyrir að plöntur í svefnherbergið séu umdeildar er um að gera að færa græna litinn inn á heimilið með plöntum. Þær geta til að mynda aukið einbeitingu og framleiðni á vinnustöðum eins og Smartland fjallaði um í janúar. Heima fyrir hafa plöntur róandi áhrif en fólk er sagt upplifa minna stress með plöntur á heimilinu. Um leið og þær eru róandi hafa þær einnig örvandi áhrif. 

Frétt af mbl.is

Lifandi blóm auka framleiðni á skrifstofunni

Þetta er það sem koma skal. Dökk veggfóður, brass og blóm. Ljósmynd/IKEA

Ef fólk þarf ekki að bæta einbeitinguna eða minnka stress er fagurfræði löggild afsökun fyrir plöntukaupum. Blómabúðir bjóða ekki bara upp á plöntur heldur líka IKEA. Þar hefur plöntuúrvalið aukist mikið að undanförnu og er svo komið að plöntur skipa stóran sess í heimilislínum fyrirtækisins. Ef plöntur eru orðnar að staðalbúnaði hjá IKEA er nokkuð ljóst að allir þurfa að eiga að minnsta kosti eina lifandi pottaplöntu.